Bárshemizge belgili atmosferanıń ozon qabatı quyashtıń ultrafiyolet nurların uslap qalatuǵın qalqan esaplanadı. Tilekke qarsı, planetamızda tabiyiy teppe-teńliktiń buzılıwı nátiyjesinde ozon qabatınıń jemiriliwi menen baylanıslı ekologiyalıq qáwip payda boldı. Bul óz gezeginde, keleshekte klimattıń boljap bolmas dárejedegi ózgeriwine, yaǵnıy insan organizminiń immun sistemasınıń hálsirewine, onkologiyalıq kesellikler sanınıń artıwına, ósimliklerdiń rawajlanıwında ózgeriwlerge alıp keliwi múmkin. Mine usı mashqalalar haqqında biz bilim hám tárbiya beriwshiler sıpatında jas áwladqa maǵlıwmatlar berip barıwımız kerek.
Dúnya júzinde 16-sentyabr Xalıqaralıq Ozon qabatın qorǵaw kúni sıpatında dunya júzi mámleketleri, sonıń menen birge Ózbekstan Respublikasında da keńnen belgilenip kelinbekte. Mine usı kún múnásibeti menen Nókis qalalıq 22-sanlı ulıwma bilim beriw mektebinde Berdaq atındaǵı Qaraqalpaq mámleketlik universitetiniń Geografiya hám tábiyiy resurslar fakulteti geografiya tálim baǵdarınıń 4A-kurs studentleri hám mektep jámaati menen birgelikte «Ozon qabıǵı hám onıń mashqalaları» atlı keshe shólkemlestirdi.
Keshege universitetiń Geografiya fakulteti professor oqıtıwshıları docent G.Xodjaeva, úlken oqıtıwshısı G.Nauruzbaeva, 22-sanlı ulıwma orta bilim beriw mektebiniń ruxıylıq hám aǵartıwshılıq isleri boyınsha direktor orınbasarı SH.Xafizova hám geografiya páni boyınsha metodikalıq birlespe baslıǵı Ataniyazova Qalligúl, pán oqıtıwshıları hám mektep oqıwshıları qatnastı. Keshede sózge shıqqqan Geografiya hám tábiyiy resurslar fakulteti professor-oqıtıwshıları mektep oqıwshılarına Ozon qabatın ne sebep qorǵaw kerekligi, onıń áhmiyeti hám wazıypaları, bul qabatqa kelip atırǵan zıyanlı zatlardı azaytıw jolları hám bul mashqalalardı sheshiw boyınsha bir neshe usıllar haqqnda aytıp ótti. Sonday-aq, 4A-kurs geografiya tálim baǵdarı studenti Atabaev Arıslanbek “Ozon qatlamın qorǵayıq” uranı astında tayarlanǵan bayanatı hámmeni bul qabıqta júz berip atırǵan ózgerislerge biyparıq bolmawǵa shaqırdı.
Keshe dawamında student jaslar tárepinen tayarlanǵan bir qansha geografiyalıq oyınlar bolıp ótti. Atap aytqanda, Bazarbaev Sultanbek tárepinen tayarlanǵan 10-klaslar arasında “Kartadan obiektti tap”, Sultamuratov Tóremurat tárepinen tayarlanǵan 9-klaslar arasında “Ozon qabıǵı krosswordta” atamasındaǵı krosswordın sheshiw jarısları ótkerildi. Sonday-aq, keshe jáne de qızıqlı bolıw ushın Atabaev Arıslanbek tárepinen keshe qatnasıwshıları arasında “Blic sorawnama” oyınları bolıp ótti hám qatnasıwshılar kóp maǵlıwmatqa iye boldı.
Ótkerilgen jarıslarda jeńimpaz bolǵan mektep oqıwshıları ámeliyatshı studentler bahalı sıylıqlar menen sıylıqlandı. Keshe oǵan qatnasqan barlıq qatnasıwshılarda úlken tásir qaldırdı hám keleshekte jaslarda ozon qabıǵın qorǵaw boyınsha kónlikpelerdi payda etti dep oylaymız. Bul ótkerilgen keshede ámeliyatshı studentler belsene qatnastı hám olardıń jumıslarına tabıslar tileymiz!
Ekonomikalıq hám sociallıq geografiya kafedrası baslıǵı G.A.Xodjaeva,
4A-kura Geografiya tálim baǵdarı studenti B.Kurbanazarov
