Asan Begimov – qaraqalpaq ádebiyatında kórnekli tulǵa. Bıyıl onıń tuwılǵanına 115 jıl toldı. Asan Begimov tek ǵana jazıwshı-dóretiwshi emes al, xalqına janı ashıytuǵın mexriban perzent sıpatında isker jámiyetlik ǵayratker bolǵan.

  «Asan Begimov-qaraqalpaq ádebiyatında roman janrınıń tiykarın salıwshısı» – Berdaq atındaǵı ádebiyat tariyxı mámleketlik muzeyinde ótkerilgen ushırasıw keshesi mine usılay ataldı.

    Ádebiy kesheni muzey direktorı Shárigúl Payzullaeva kiris sóz benen ashtı hám alıp bardı. «Asan Begimov-qaraqalpaq ádebiyatında roman janrınıń tiykarın salıwshısı» degen temada filologiya ilileriniń doktorı Perdebay Najimov bayanat jasadı. Bayanatshı «Balıqshınıń qızı» romanı tiykarında romanshılıq dástúrleri, obraz jasaw sheberligi máselelerine pikir bildirdi.  «Asan Begimovtıń qaraqalpaq jurnalistikasındaǵı ornı» atamasındaǵı bayanat penen filologiya ilimleriniń kandidatı, docent Ziyada Qojıqbaeva bayanat jasadı. Ol «Miynet ádebiyatı» jurnalınıń shólkemlestiriliwi, Asan Begimovtıń UzTAGta, Qaraqalpaqstan radiosındaǵı xızmetlerine toqtap ótti.

  Keshede sózge shıqqan jazıwshınıń aqlıqları Murat Begimov, Nursulıw Begimova hám Aysánem Begimovalar jazıwshıdan qalǵan bay miyras – onıń kitapları, qol jazbaları tuwralı aytıp ótti.

  A.Begimovtıń shawlıqları tárepinen atqarılǵan kórkem oqıw hám baqsılar tárepinen atqarılǵan qosıqlar keshe qatnasıwshılarına zawıq baǵıshladı. 

    Ádebiy keshe qatnasıwshıları Asan Begimov miynetlerinen dúzilgen kórgizbeni tamashaladı. Onda bahalı qol jazbalar, jazıwshınıń guwalıqları, kitapları, birinshi qollanǵan jazıw mashinkası hám t.b. tariyxı boyınsha qızıqlı maǵlumatlar menen tanıstı. Ótkerilgen ádebiy keshe tamashagóylerde unamlı tásir qaldırdı.

Amir Bazarbaev, Berdaq atındaǵı QMU, Jurnalistikası Tálim baǵdarı 4-A kurs studenti