Qaraqalpaq mámleketlik universiteti quramındaǵı Repressiya qurbanların eslew muzeyi jámááti muzeyge kelgen keń xalıqqa muzey eksponatların tanıstırıp qoymastan, Muzeyde ruwxıy aǵartıwshılıq, muzey eksponatların hújjetlestirip, ilimiy aylanısqa túsirip,muzey ekspoziciyaların bayıtıw maqsetinde respublikamızdıń barlıq orınlarına turaqlı túrde saparlardıda birge alıp barmaqta.
Ámiwdárya rayonındaǵı joqarıda atı atalǵan elatlıqlar burınnan xalqı miynetkesh diyqanshılıqtan mol ónim jetistiretuǵın ataqlı jergilikli agronom hám atayı diyqanları bolǵan. Paxta jetilistiriw boyınsha Ámiwdárya rayonı burınǵı awqam dáwirinde de hám házirde Qaraqalpaqstan Respublikasındaǵı eń tárezisi awır aymaqlardan esaplanadı, 1984-1986 jıllarda “Paxta isi” boyınsha jazıqsız juwapkershilikke tartılǵanlardıń da sanı boyınshada basqa rayonlarǵa salıstırǵanda ádewir kóbirek.
Qaraqalpaq mámleketlik universiteti quramındaǵı Repressiya qurbanların eslew muzeyi direktorı A.Qudiyarov muzey xızmetkeri A.Alimbetov, Tariyx qánigeligi 1-basqısh magistrantı X.Artıqbaevlar muzey ekspoziciyasın jańa materiallar menen bayıtıw maqsetinde Ámiwdárya rayonındaǵı Qıtay, Qańlı, Qılıshbay elatlarında 2022-jıl 2-3-oktyabr kúnleri gezektegi úshinshi ret ilimiy saparda bolıp qayttı. (birinshi sapar 2019-jıl 30-31 yanvar kúnleri, ekinshi sapar 2021-jıl 26-27 noyabr kúnleri bolǵan edi).
Sapar dawamında Ámiwdárya rayonı Qılıshbay APJ, B.Naxshbandiy kóshesi, 5 -jay turǵını burınǵı Qılıshbay sovxozı direktorı lawazımında islegen, 1986 jılı «Paxta isi» boyınsha irkiwge alınǵan Najmatdinov Axmettiń balası Najmatdinov Xusnitdinniń shańaraǵında bolıp ákesiniń jumıs islegen waqıtlarındaǵı hám jeke súwretleri, irkiwge alınǵanı hám aqlanǵanlıǵı haqqındaǵı hújjetleri, sol dáwirde rayonlıq keńeske depudat bolıp saylanǵanlıǵı haqqındaǵı gúwalıǵı, Najmatdinov Axmet tárepinen jazılǵan kitabı, (Yangi sharoitga kadrlarga yangicha talablar. T.,1972), qánigeni esapqa alıw boyınsha jeke is qaǵazı, jumıs islegen dáwirdegi húrmet jarlıqları, ayırım medalları muzeyge eksponat retinde alındı. Sonıń menen birge Qılıshbay APJ, Altın ásir kóshesi, 3 -jay turǵını burınǵı Qılıshbay sovxozında bólim baslıǵı lawazımında islegen, 1986 jılı «Paxta isi» boyınsha irkiwge alınǵan Ashirov Orınbaydıń balası Ashirov Mansurdıń shańaraǵında bolıp ákesiniń jumıs islegen waqıtlarındaǵı hám jeke súwretleri, jumıs waqtında alǵan húrmet jarlıqları muzeyge alındı
Jáne de Ámiwdárya rayonı Kúyik kópir APJ turǵını 1986- jılı «Paxta isi» boyınsha irkiwge alınǵan burınǵı Yu.Axunbabaev kolxozı bas esapshısı lawazımında islegen Tulibaev Aminbaydıń shańaraǵına barıp onıń ómirlik joldası Tursınbaeva Gulara apa menen ushırasıp, sol dáwirdegi kórgen qıyınshılıqları jazıp alındı hám muzey ekspoziciyası ushın onıń da jumıs islegen waqıtlarındaǵı eske túsiriw dápterleri (qol jazbaları-jumıs babında hám qamaqta jatırǵan waqıttaǵı), jumıs waqıtlarındaǵı hám jeke súwretleri, tergew waqtındaǵı soraw juwap hám jumıs babındaǵı hújjetleri, qánigeni esapqa alıw boyınsha jeke is qaǵazı, sudqa arza shikayat hám bildiriw xatları, jeke ózi paydalanǵan kóz áynegi, qol hám qalta saatları alındı.
Sapar dawamında Kúyik kópir APJ, Gúlsim kóshesi №10 turǵını 1986- jılı «Paxta isi» boyınsha irkiwge alınǵan burınǵı Yu. Axunbabaev kolxozında paxta qabıllawshı lawazımında islegen Saburov Baltabaydıń shańaraǵına barıp onıń kelini Jumabaeva Gulnaradan, Saburov Baltabaydıń qánigeligi boyınsha gúwalıǵı, profsoyuz shólkemine aǵzalıq bileti, jumıs islegen waqıtlarındaǵı hám jeke súwretleri, sonday aq, Qıtay APJ Namuna kóshesi 6-jay turǵını 1986- jılı «Paxta isi» boyınsha irkiwge alınǵan burınǵı Yu.Axunbabaev kolxozında bas ekonomist lawazımında islegen Asqarov Primannın shańaraǵında bolıp onıń qızı Asqarova Svetlanadan, Asqarov Primannın jumıs waqtında jeke ózi paydalanılǵan hár qıylı jazıw quralları, ayırım medallar gúwalıqları, jumıs waqıtlarındaǵı hám jeke súwretleri muzeyge alındı.
Sonday-aq Xalimbek APJ turǵını, burınǵı Qılıshbay sovxozında túrli lawazımlarda islegen Jumamuratov Bektemirdiń ózinen qánigeligi haqqındaǵı maǵlıwmatnaması, jeke súwreti, qamalǵanlıǵı hám aqlanǵanlıǵı haqqında hújjeti, sol dáwirge tiyisli pul birligi muzey ekspoziciyası ushın alındı.
Ilimiy sapar dawamında alınǵan zatlar, súwret hám hújjetlerler qánigeler tárepinen qayta úyrenilip analiz etilip bolınǵannan soń muzey ekspoziciyası ushın rásmiylestirilip alınadı. Bul eksponatlar muzey ekspoziciyasına qoyıllıw menen birge keleshekte muzeyde studentler, magistrantlar hám jas ilimiy xızmetkerler ushın ilimiy derek retinde paydalanıwda úlken áhmiyetke maǵlıwmat bolıp esaplanadı.
Ańsatbay Alimbetov
Muzey xızmetkeri
