Bársheńizdiń xabarıńız bar, 2017-jıl 30-iyun kúni Húrmetli Prezidentimiz tárepinen “Kamolot” jaslar jámiyetlik háreketi ornına jańa shólkem Ózbekstan jaslar awqamı shólkemlestirilip hám Jaslarǵa tiyisli mámleketlik siyasatınıń nátiyjeligin arttırıw hám jaslar awqamı jumısların qollap-quwatlaw boyınsha PP 5106-sanlı Prezident Pármanı qabıl etildı. Usı Párman tiykarında búgingi kúnde universitetimizde jaslar awqamı baslanǵısh shólkemi jumıs alıp barmaqta. Universitetimizdiń baslanǵısh shólkeminiń ámelge asırılǵan jumısları hám jańa oqıw jılında jańadan baslanǵısh shólkemi jetekshisin sawlaw maqsetinde usı jıldıń 7-oktyabr kúni Berdaq atındaǵı Qaraqalpaq mámleketlik universitetinde jaslar awqamı baslanǵısh shólkeminiń esap beriw hám saylaw májilisi bolıp ótti.
Onda universitetimizdiń jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov, Jaslar awqamı Nókis qalalıq Keńesi baslıǵı Q.Qoshımuratova, barlıq fakultet jetekshileri hám topar jetekshilerinen dúzilgen delegatlar qatnastı. Dáslep universitetimizdiń jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov, sózge shıǵıp, búgingi kúnde universitetimizdiń baslanǵısh shólkem tárepinen ámelge asırılıp atırılǵan ilajlar haqqında óz unamlı pikirlerin bildirip, talabanlarǵa áwmet tiledi.
Kún tártibindegi birinshi másele boyınsha baslanǵısh shólkemi tárepinen 2021-2022 oqıw jılı dawamında ámelge asırılǵan jumısları boyınsha D.Abadanov maǵlıwmat berip ótti. Sonday-aq, kún tártibindegi basqa máseleler boyınsha delegat aǵzalar tárepinen dawısqa qoyılıp, yaǵnıy universitetimiz jaslar awqamı baslanǵısh shólkeminiń 13 aǵzasın saylaw hám universitetimizde ruwxıy-aǵartıwshılıq jumıslarında, jámiyetlik jumıslarda, student-jaslarımızdıń bilimleri, qábiletlerin júzege shıǵarıwda ayrıqsha belsendilik kórsetip kiyatırǵan student-jaslar arasınan Nókis qalalıq Konferenciyasına 10 delegat aǵzaları saylap alındı.
Kún tártibindegi tiykarǵı másele bolǵan Universitet adminstraciyası hám Jaslar awqamınıń joqarı organı menen birge baslanǵısh shólkemi jetekshisine usınılǵan 3 talaban dawısqa qoyılıp, universitetimiz jaslar jetekshisi lawazımına Abadanov Dawranbek Japbarbergenovich saylandı.
Bunnan soń, D.Abadanov sózge shıǵıp, jáne bir márte isenim bildirgeni ushın bárshege óz minnetdarshılıǵın bildirdi.
QMU baspasóz xızmeti
