Berdaq atındaǵı Qaraqalpaq mámleketlik universitetiniń Qaraqalpaq filologiyası hám jurnalistika fakultetinde «Jurnalistikanıń birinshi muǵallimi» atamasında ushırasıw keshesi bolıp ótti. Onda Ózbekstan Respublikasına xızmet kórsetken jurnalist K.Reymov, Qaraqalpaqstan Respublikasına xızmet kórsetken jurnalist E.Ermanov, fakultet kafedra baslıǵı D.Bekbawliev, tyutor M.Reymov hám student-jaslar qatnastı. Ushırasıw dawamında 40 jıldan aslam waqtın jurnalistikaǵa baǵıshlaǵan nuraniy ustaz jurnalistler óziniń bilim hám kónlikpelerin, usı taraw boyınsha toplaǵan tájiriybeleri haqqında pikirlerin studentler menen bólisti. Sonıń menen birge: «Men professional jurnalist emespen, meni turmıs hám gazeta tárbiyaladı. Qurǵaq sóz heshqashan abıray alıp bermeydi. Gazeta kúnniń talabına juwap beriwi kerek » – degen sózleri menen ustaz jurnalist E.Ermanov bul kásiptiń mashaqatlı ekenligin ayrıqsha aytıp ótti. Ushırasıw juwmaǵında keshe qatnasıwshıları ózleriniń qızıqtırǵan sorawlarına juwaplar aldı. Sonday-aq, miymanlar tárepinen eń jaqsı soraw iyelerine óziniń avtorlıǵındaǵı kitaplar sawǵa etildi.

Aysara Pirnazarova

Qaraqalpaq filologiyası hám jurnalistika fakulteti 2 «A»-basqısh studenti