Búgin Paytaxtımızdaǵı payızlı orınlarınıń birinde Berdaq atındaǵı Qaraqalpaq mámleketlik universiteti jámááti tárepinen «Nuranıy hám jaslar» atamasında ushırasıw keshesi shólkemlestirildi. Ushırısıw keshesine Qaraqalpaqstan Respublikası Máhálle hám nuranıylardı qollap-quwatlaw ministri orınbasarı T.Abdijapbarov, Berdaq atındaǵı Qaraqalpaq mámleketlik universiteti rektorı A.Reymov, universitetimizdiń Nuranıylar keńesi baslıǵı B.Abdikamalov, uzaq jıllar dawamında elimiz hám xalqımız ushın pidayı miynet etken nuranıy-ustazlar, professor-oqıtıwshılar hám belsendi student-jaslar qatnastı.
Dáslep Berdaq atındaǵı Qaraqalpaq mámleketlik universiteti rektorı A.Reymov sózge shıǵıp, Mámleketimizde kekse áwlad wákillerine mámleket tárepinen kórsetilip atırılǵan ǵamxorlıqlar haqqında aytıp ótti. Sonday-aq, olardıń jámiyette, shańaraqlarda hám máhállelerde tınıshlıq-tatıwlıqtı támiyinlew, jaslarımızdıń qálbine, sana – sezimine, Ana – Watanǵa muhabbat hám sadıqlıq tuyǵıların sińdiriwde, olardı kámil insan etip tárbiyalaw jolındaǵı pidáyı xızmetlerin aytıp, aldaǵı jumıslarında tabıslar tiledi. Bunnan soń, Qaraqalpaqstan Respublikası Máhálle hám nuranıylardı qollap-quwatlaw ministri orınbasarı T.Abdijapbarov sózge shıǵıp, Húrmetli Prezidentimiz tárepinen búgingi kúnde nuranıylardı qollap-quwatlaw, olarǵa húrmet kórsetiw baǵdarında qabıl etılip atırılǵan párman hám qararlar haqqında sóz etip, bársheni bayram menen qutlıqladı. Ilajda shólkemlestiriwshiler tárepinen nuranıy-ustazlarǵa bayram sawǵaları tapsırılıp, universitetimizdiń studentleri tárepinen tayarlanǵan koncert baǵdarlaması menen dawam etti.
QMU baspasóz xızmeti
