Búgin, 18-oktyabr kúni Tashkent qalasında Innovaciyalıq rawajlanıw ministrliginde «InnoWeek.uz-2022» Xalıq aralıq innovaciyalıq ideyalar hápteliginiń ashılıw máresimi bolıp ótti. Bul jılǵı innovaciyalıq ideyalar hápteligi “Turaqlı rawajlanıw ushın jasıl innovaciyalar” uranı astında ótkerilmekte. Háptelikke respublikadaǵı barlıq joqarı oqıw orınları hám ilim-izertlew institutlarınıń ilimpazları, jergilikli isbilermenler hámde student jaslar ózleriniń innovaciyalıq islenbeleri menen qatnaspaqta.
«InnoWeek.uz-2022» Xalıq aralıq innovaciyalıq ideyalar hápteligine Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdimambetov basshılıǵındaǵı professor-oqıtıwshılar: “Arxitektura” kafedrası úlken oqıtıwshısı N.Kaliev, “Organikalıq hám organikalıq emes ximiya” kafedrası professorı M.Allaniyazova, “Qaraqalpaq ádebiyatı” kafedrası assistenti A.Jarımbetov, “Neft hám gaz texnologiyası” kafedrası docenti w.a N.Yusupova hámde “Arxitektura” fakulteti “Diywal hám pardozlawshı qurılıs materialları texnologiyası” baǵdarı 3-kurs studenti Q.Piyshenbaevlar tómendegi innovaciyalıq islenbeleri menen belsendi qatnaspaqta:
1.“IJDAN” ısıtıw úskenesi;
- “Islep shıǵarıw kárxanalarında gaz sarıplanıwın ekonomlawshı tejemli úskene (Gorelka)”;
- “Innovaciyalıq lego gerbish”;
- “Vita Karakalpak MA4” azıqlıq ónimi;
- “Omırtqa kesellikleriniń kóbeyip ketiwiniń aldın alıwshı medicinalıq matras”;
- Hárqıylı aǵash shıǵındılarınan islengen briket;
- “Innovaciyalıq keramikalıq gerbish”;
- “Dástúriy emes sút ónimlerin islep shıǵarıwdı shólkemlestiriw”;
- “Uglevodorod qaldıqlarınan ekilemshi materiallar alıw texnologiyası – Qurılıs
bitumı”.
Innovaciyalıq ideyalar hápteligi kóterińki ruwxta ótkerilmekte. Háptelik sheńberinde kórgizbeler 21-oktyabrge shekem dawam etedi.
