Búgin, 21-oktyabr kúni Innovaciyalıq rawajlanıw ministrliginde «InnoWeek.uz-2022» Xalıq aralıq innovaciyalıq ideyalar hápteligi kórgizbeleri óz juwmaǵına jetti. Kórgizbege Qaraqalpaqstan Republikası, wálayatlar haım Tashkent qalasınan kelgen joqarı oqıw orınları hám ilim-izertlew institutlarınıń ilimpazları, jergilikli isbilermenler hámde student-jaslar ózleriniń innovaciyalıq islenbeleri menen qatnastı.
«InnoWeek.uz-2022» Xalıq aralıq innovaciyalıq ideyalar hápteligi sheńberinde ótkerilgen kórgizbeler juwmaǵına kóre, oǵan belsendi qatnasqan professor-oqıtıwshılar, isbilermenler hámde student-jaslar Innovaciyalıq rawajlanıw ministrliginiń arnawlı sertifikatları menen sıylıqlandı.
Sonday-aq, «InnoWeek.uz-2022» Xalıq aralıq innovaciyalıq ideyalar hápteligine Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdimambetov basshılıǵındaǵı professor-oqıtıwshıları hámde student-jasları belsendi qatnastı.
Quwanıshlısı, universitetimiz Arxitektura fakulteti “Diywal hám pardozlawshı qurılıs materialları texnologiyası” baǵdarınıń 3-basqısh studenti Pishenbayev Qarjawbay Baxıtbay ulı “Innovaciyalıq keramikalıq gerbish” atlı islenbesi menen qatnastı. Ekspertler quramı tárepinen onıń islenbesi joqarı bahalanıp, «InnoWeek.uz-2022» Xalıq aralıq innovaciyalıq ideyalar hápteliginiń “Eń jas oylap tabıwshı” nominaciyası boyınsha jeńimpaz dep tabıldı hámde Ózbekstan Respublikası Innovaciyalıq rawajlanıw ministri I.Abduraxmonov tárepinen arnawlı sertifikat hám estelik ushın 3D Printer penen sıylıqlandı.
Universitet rektoratı Pishenbayev Qarjawbaydı hám universitet jámáátin erisken úlken jetiskenlikler menen qutlıqlaydı hám Qarjawbaydıń dóretiwshilik ilimiy jumıslarında tasqın tabıslar tilep qaladı!
QMU Baspasóz xızmeti
