Berdaq atındaǵı Qaraqalpaq mámleketlik universiteti tárepinen ishki turizmdi rawajlandırıw maqsetinde student-jaslarǵa Moynaq rayonına sayaxat shólkemlestirildi. Sayaxat dawamında universitettiń belsendi studentleri tárepinen Moynaq rayonında “Ullı keleshekti Moynaq jasları menen birgelikte quramız!” atamasında rayon jasları menen ilajlar shólkemlestirildi.
Dáslep, Moynaq rayonı «Jaslar orayı»nda universitetimizdiń jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov rayon jasları menen ushırasıp, búgingi kúnde Húrmetli Prezidentimizdiń jaslarǵa qaratıp atırılǵan itibarı, ásirese oqıp bilim alaman degen jaslarǵa mámleketimiz tárepinen keń múmkinshiliklerdiń jaratılıp berilgenligin aytıp ótti. Bunnan soń, rayon jaslarınıń qatnasıwında universitetimizdiń studentleri tárepinen tájriybe mektebin jaratıwda ingliz tili, jas xudojnikler, baqsı hám jırawshılardıń sheberlik sabaqları hám viktorina oyınları ótkerildi. Ótkerilgen viktorina oyınlarına belsene qatnasqan oqıwshılarǵa universitetimizdiń Kásiplik awqamı komiteti tárepinen estelik sawǵaları tapsırıldı.
Sonday-aq, belsendi studentler tárepinen “Jasıl mákán” ulıwma milliy joybarın ámelge asırıw maqsetinde “Jaslar orayı” átirapına náller tigildi. Kúnniń ekinshi yarımında student-jaslar Kemeler qábiristanı ashıq aspan astındaǵı múzeyinde hám Aral teńizi tariyxı muzeyinde bolıp, ol jerdegi bay tariyxıy miyraslar, Aral teńizi menen baylanıslı eksponantlar menen keńnen tanıstı. Bunday sayaxatlardı, ilajlardı ótkeriwden tiykarǵı maqset ishki turizmdi rawajlandırıw, student-jaslardı bay tariyxıy miyraslarımız benen tanıstırıw, olarda Ana – Watanǵa muhabbat hám sadıqlıq tuyǵıların sińdiriw, túrli unamsız illetlerden saqlaw, kámil insan etip tárbiyalaw bolıp tabıladı.
QMU Baspasóz xızmeti
