Búgin Berdaq atındaǵı Qaraqalpaq mámleketlik universiteti Biologiya fakultetinen hám Ájiniyaz atındaǵı Nókis mámleketlik pedagogikalıq institutı Tábiyiy pánler fakultetinen bir topar studentler magistrantlar, tayanısh doktorantlar hám professor-oqıtıwshılar Aqpetkey arxipelagında boldı.
Xabarıńız bar sońǵı jılları Ózbekstan Respublikası Prezidentiniń baslaması menen Araldıń qurǵaǵan ultanında toǵayzarlıq payda etiw boyınsha keń kólemli jumıslar alıp barılmaqta. Atap aytqanda 2018-2021-jılları bul aymaqqa 1 mln. 600 mıń ga maydanǵa seksewiller egilgen. Aqpetkey arxipelagı maydanında bolsa 2006-2007-jılları 2700 ga maydanǵa seksewiller egilgen, házirgi waqıtta bul jerdegi seksewiller úlken toǵayzarlıqqa aylanǵan. Aqpetkey arxipelagında búgin Biologiya fakultetiniń studentleri magistrantları, tayanısh doktorantları hám professor-oqıtıwshıları Araldıń qurǵaǵan ultanında seksewil nállerin egiw hám ilim-izertlew jumısların alıp bardı.
Dáslep, student-jaslar bul jerde quslardıń túrlerin anıqlaw, olardıń kóbeyiwine shárayat jaratıw maqsetinde quslarǵa uyalar onatıwdan basladı. Bunnan soń, universitettiń Biologiya fakulteti janındaǵı Bioekologiya ilmiy lavoratoriya ásbap úskeneleri járdeminde hawanıń, topıraqtın quramın anıqlaw, sonday-aq, kemiriwshi haywanlardıń shólde tarqalıwı jánede bioekoligiyalıq ózgesheligin úyreniw boyınsha magistrantlar, tayanısh doktorantlar tárepinen ilim-izertlew jumısların alıp bardı. Kúnniń ekinshi yarımında student-jaslar tárepinen ekologiyalıq jaǵdaydı jaqsılaw maqsetinde seksewil nálleri egildi.
Bunday ilajlardı ótkeriwden tiykarǵı maqset Ana tábiyattı asıraw, tábiyǵıy resurslardan aqılǵa uǵras paydalanıw, sonday-aq jer, suw, toǵay, atmosfera hawasın, ósimlikler hám haywanatlar dúnyasın qorǵaw, olardı zıyanlanıwdan, joq bolıp ketiwiniń aldın alıw boyınsha, student-jaslarǵa túsindiriw jánede tábiyatımızdı asırıwǵa óz úlesimizdi qosıw bolıp tabıladı deydi- Biologiya fakulteti dekanı, biologiya ilimleri doktorı, professor Yakub Ametov.
QMU Baspasóz xızmeti
