Búgin, 24-oktyabr kúni Berdaq atındaǵı Qaraqalpaq mámleketlik universiteti student-jasları arasında, jaslardıń dóretiwshilik qábiletin arttırıw, jańa innovaciyalıq ideyaların qollap-quwatlaw hám júzege shıǵarıw maqsetinde “Jıl studenti” tańlawınıń “Jıldıń eń oylap tabıwshı – innovator studenti” nominaciyası boyınsha tańlaw ótkerildi.

Onda universitettiń úzliksiz (akademiyalıq tánepissiz) kúndizgi tálim baǵdarında oqıp atırǵan 2-, 3- hám 4-kurs studentleri arasınan jámi 10ǵa jaqın studentler ózleriniń innovaciyalıq islenbeleri menen qatnastı. Bunda qatnasıwshılardıń usı jılda ózleri tárepinen jaratılǵan ilimiy jumıslar, oylap tabılıwlar, innovatciyalıq ideyaları, ratsionalizatorlıq usınıslar, olardıń jańalıǵı, ilimiy áhmiyetliligi tóreshiler tárepinen kórip shıǵılıp, múnásip bahalandı.

Tańlaw juwmaǵına kóre, Matematika fakulteti “Kompyuter ilimleri hám programmalastırıw texnologiyaları” baǵdarınıń 3-basqısh studenti Qogambayev Asadbek “Orfo-QARAKEŃ” (MS Office dastúri ushın programma) joybarı menen 1-orındı, Arxitektura fakulteti “Diywal hám pardozlawshı qurılıs materialları texnologiyası” baǵdarınıń 3-basqısh studenti Pishenbayev Qarjawbay “Innovaciyalıq keramikalıq gerbish” atlı joybarı menen 2-orındı, Geografiya hám tábiyiy resurslar fakulteti 4-basqısh studenti Tórejanov Islamjan “Travel in Karakalpakstan” atlı joybarı menen 3-orındı jeńip aldı. Bunday tańlawlardı ótkeriwden tiykarǵı maqset student-jaslardıń jańa innovaciyalıq ideyaların qollap-quwatlaw hám júzege shıǵarıwında tiykar bolıp xızmet etedi.

QMU Baspasóz xızmeti