Usı jıldıń 24-oktyabr kúni Termiz injenerlik-texnologiya institutınıń student-jasları Berdaq atındaǵı Qaraqalpaq mámleketlik universitetinde miymanda bolıp, bul jerde student-jaslar ushın jaratılǵan sharayatlar menen tanıstı.

Dáslep, Berdaq atındaǵı Qaraqalpaq mámleketlik universiteti rektorı A.Reymov hám Termiz injenerlik-texnologiya institutınıń rektorı Ó.Axmedovlar ushırasıp, búgingi kúnde universitetimizde alıp barılıp atırılǵan jumıslar, Xalıqaralıq birge islesiwler, professor-oqıtıwshılar, student-jaslardıń jetiskenligi haqqında óz-ara pikir alıstı. Ushırasıw dawamında aldaǵı waqıtları eki joqarı oqıw orınları arasında qurılıs, arxitektura, sanaat-texnologiya baǵdarları boyınsha birge islesiw boyınsha memorandumǵa qol qoyıstı. Bunnan soń, miymanlar universitetimizdegi Ximiya hám bioekologiya lavoratoriyaların kózden ótkerip, bul jerde alıp barılıp atırılǵan ilimiy jumısalar menen tanıstı.

Sonıń menen bir qatarda Berdaq atındaǵı Qaraqalpaq mámleketlik universiteti hám Termiz injenerlik-texnologiya institutınıń belsendi student-jasları tárepinen «Jaslar dóretiwshiligi – doslıq tımsalı» atamasında koncert baǵdarlaması shólkemlestirildi. Ilajda universitetimiz studentleri tárepinen xalıq saz ásbapları duwtar, qobız sıyaqlı, milliy buyımlarda atqarılǵan shıǵıwlar miymanlarda úlken qızıǵıwshılıq oyattı. Sonday-aq, ilajda eki joqarı oqıw orınları studentleriniń  atqarǵan milliy, estrada qosıqları, hár qıylı ayaq oyınlar, kórkem shıǵıwlar jıynalǵanlarǵa ózgeshe zawıq baǵıshladı. Ilajdan soń miymanlar universitet jámáátine óz minnetdarshılıǵın bildirdi.

QMU baspasóz xızmeti.