Berdaq atındaǵı Qaraqalpaq mámleketlik universitetinde jańa redakciyadaǵı Miynet kodeksiniń mazmun-mánisi hám áhmiyetine baǵıshlanǵan seminar bolıp ótti. Ilajda Oliy Majlis Nızamshılıq palatası Spikeri orınbasarı Zuxra Ibragimova, Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, senatorlar, deputatlar, ministrlik hám mákemeler wákilleri, kárxana hám shólkemler basshıları sonıń menen birge student jaslar qatnastı.
Seminardı Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev kiris sóz benen ashtı. Onda tiykarınan jańa redakciyadaǵı Miynet kodeksiniń mazmun mánisin huqıqtı qollawshılarǵa túsindiriw, onıń orınlanıwın támiyinlew sıyaqlı áhmiyetli máseleler talqılandı.
Ilajda Oliy Majlis Nızamshılıq palatası Spikeriniń orınbasarı Z.Ibragimova, Oliy Majlis Nızamshılıq palatasınıń deputatı M.Ibragimov, Senattıń Aral regionın rawajlandırıw máseleleri hám ekologiya komiteti baslıǵınıń orınbasarı B.Matmuratov, Ózbekstan Respublikası Bántlik hám miynet qatnasıqları ministriniń birinshi orınbasarı E.Muxitdinov shıǵıp sóylep, jańa redakciyadaǵı Miynet kodeksiniń mazmun-mánisi hám áhmiyetine, sonday-aq ondaǵı jeńillikler menen imkaniyatlarǵa toqtap ótti. Sonday-aq, sonǵı jıllarda Ózbekstanda miynet qatnasıqlarına jańasha jantasıw júzege keldi. Múlk iyeleri hám jumıs beriwshilerdiń sanı keskin arttı. Fizikalıq shaxslarǵa da jumıs beriwshi statusı berildi. Bulardıń barlıǵı miynet bazarında jańa reformalardı talap etedi.
Bunday sharayatta miynet nızamshılıǵın modernizaciyalaw menen baylanıslı wazıypalardı ámelge asırıw dáwir talabı esaplanadı. Usı tárepten jańa Miynet kodeksi joybarı islep shıǵıldı hám bul proceste 10 nan aslam xalıqaralıq shólkem, sonnan, xalıqaralıq miynet shólkeminiń bir qatar konvenciyaları, 60 tan aslam mámleket tájiriybesi úyrenildi.
Seminarda shıǵıp sóylewshiler usı hújjet tarawdaǵı bir qatar mashqalalardı, miynet bazarındaǵı jaǵdaydı esapqa alıp, bazar ekonomikası talaplarınan kelip shıqqan halda, nızamlı sheshiwde, islegen jumısına, jumıs beriwshi bolsa kirgizgen qarjısına múnásip tárizde itibar hám xoshametlewge iye bolıwın kepilleytuǵın áhmiyetli huqıqıy tiykar bolıp xızmet etetuǵınlıǵı atap ótildi.
Seminar qatnasıwshıları ózlerin qızıqtırǵan sorawlarǵa juwap aldı.
