Búgin Berdaq atındaǵı Qaraqalpaq mámleketlik universitetinde «Jıl studenti 2022» tańlawı boyınsha universitet basqıshı jeńimpazları hám jámiyetlik jumıslarda belsendilik kórsetip júrgen bir qatar student-jaslardı xoshametlew máresimi bolıp ótti.

Onda universitetimizdiń Jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov, Oqıw isleri boyınsha prorektorı O.Duysenbaev, Ilimiy isler hám innovaciyalar boyınsha prorektorı I,Turdımambetov, Hayal-qızlar máseleleri boyınsha rektor másláhátshisi I.Seytnazarova hám student-jaslar qatnastı.

Ilajdı universitetimizdiń Jaslar máseleleri hám ruwxıy-aǵartıwshılıq isleri boyınsha prorektorı S.Alauatdinov ashıp berdi. Ol óz sózinde student-jaslardıń qolǵa kirgizgen tabısları menen qutlıqlap, Mámleketimiz tárepinen jaslarǵa berilip atırılǵan keń múmkinshiliklerden aqılǵa muwapıq paydalanıp, aldaǵı waqıtları Watanımızdıń rawajlanıwında ayanbay xızmet etiwine tilekleslik bildirdi.

Bunnan soń, «Jıl studenti 2022» tańlawı boyınsha universitet basqıshı jeńimpazları hám jámiyetlik jumıslarda belsendilik kórsetip júrgen bir qatar student-jaslar xoshametlendi. Ilaj universitetimiz belsendi studentleri tárepinen tayarlanǵan koncert baǵdarlaması hám viktorina oyınları menen dawam etti.

Maǵlıwmat ushın «Jıl studenti» respublikalıq tańlawınıń universitet basqıshında student-jaslar 7 nominaciya boyınsha qatnasıp, bunda úzliksiz (akademiyalıq tánepissiz) kúndizgi bilimlendiriw túrinde oqıp atırǵan 2-, 3- hám 4-kurs studentleri arasında qatnasıwshılardıń usı jılda ózleri tárepinen jaratılǵan ilimiy jumıslar, oylap tabılıwlar, innovatciyalıq ideyaları, ratsionalizatorlıq usınıslar, shólkemlestiriwshilik qábileti hám usı tiykarda ózi shólkemlestirgen ilajlar, qolǵa kirgizgen tabısları, olardıń jańalıǵı, ilimiy áhmiyetliligi tóreshiler tárepinen kórip shıǵılıp, múnásip bahalandı.

QMU baspasóz xızmeti