Búgin Berdaq atındaǵı Qaraqalpaq mámleketlik universiteti Ózbek filologiyası fakultetinde «Túrkiy tilleriniń rawajlanıwı hám izertleniwiniń áhmiyetli máseleleri» atamasında xalıqaralıq ilimiy-ámeliy konferenciya ótkerildi. Onda Qaraqalpaq mámleketlik universiteti professor-oqıtıwshıları, jas alımları, belsendi studentler, hám Qazaqstannan, Túrkiyadan alımlar qatnastı.
Konferenciyanı universitetimiz rektorı A.Reymov ashıp berip, búgingi kúnde mámleketimizde xalıq xojalıǵınıń barlıq tarawları qatarında ilim-pánimiz de zaman menen teń rawajlanıwı, ilim-pándi rawajlandırıw, elede jetilistiriw hám de xalıqaralıq baylanıslardı jáne de bekkemlewde búgingi «Túrkiy tilleriniń rawajlanıwı hám izertleniwiniń áhmiyetli máseleleri» atamasında ótkerilip atırılǵan xalıqaralıq ilimiy-ámeliy konferenciya jumıslarına tabıslar tiledi.
Konferenciyanı ótkeriwdiń tiykarǵı maqseti Ózbekstan Respublikası Ministrler Kabinetiniń «Ózbekstan Respublikasında 2022-jılda xalıqaralıq hám respublika kóleminde ótkeriletuǵın ilimiy-ámeliy ilajlar rejesi haqqında»ǵı 2022 jıl 7-marttaǵı 101-f-sanlı Pármanı hám Ózbekstan Respublikası Joqarı hám orta arnawlı bilimlendiriw ministrliginiń 2022-jıl 14-marttaǵı 97-sanlı buyrıǵında belgilengen wazıypalardan kelip shıǵıp, til bilimi tarawında xızmet alıp barıp atırǵan respublikamız hám de shet el izertlewshileriniń ilimiy-ámeliy jumısların úyreniw, tájriybeli izertlewshilerdiń ilimiy jetiskenlikleri menen tanıstırıw, jaslardıń ilimiy izertlewlerin qollap-quwatlaw hám ilimiy shólkemler menen birge islesiwdi jáne-de asırıw, tálim tarawın jana basqıshǵa kóteriwden ibarat.
Konferenciya oflayn hám zoom baǵdarlaması tiykarında onlayn tárzide ótkerildi. Konferenciyada «Zamanagóy til bilimi izertlewler orayında», «Túrkiy tillerdiń izertleniwiniń teoriyalıq hám ámeliy tiykarları», «Zamanagóy til biliminde til hám mádeniyattıń birligi», «Túrkiy tiller aralıq awdarma máseleleri», «Tildi oqıtıwdıń ulıwma metodologiyalıq principleri» sıyaqlı sekciyalarda daǵaza etilgen ilimiy-izertlewler analiz etilgen. Sonday-aq konferenciya dawamında mámleketimizde bolıp atırǵan sociallıq-ekonomikalıq, siyasiy, mádeniy ózgerisler, tálim tarawındaǵı innovaciyalar haqqında aytıp ótildi.
Konferenciya qatnasıwshıları tárepinen kórsetilgen temalar boyınsha ilimiy-izertlew menen shuǵıllanıwǵa tiyisli máseleler, solardıń qatarında milliy hám shet el jurnallarında ilimiy maqalalardı járiyalaw, respublika hám xalıqaralıq konferenciyalarda tezislerdi tayyarlaw, tiyisli tártipte rásmiylestiriw hámde baspadan shıǵarıw, ilimiy hám innovaciyalıq xızmetler boyınsha hár túrli tańlawlar, olarda qatnasıw tártibi hámde shártleri haqqında keńnen maǵlıwmatlar berildi.Konferenciya dawamında jas izertlewshiler, doktorantlar ózlerini qızıqtırǵan sorawlarına jawaplar aldı, professor-oqıtıwshılar shet el alımları menen tájriybe alıstı.
