Berdaq atɪndaǵɪ Qaraqalpaq mámleketlik universiteti Turkɪyanıń Ege universiteti menen bilim beriw hám ilimiy izertlew boyınsha birge islesiw máselesin 2022-jıldıń 29-mart sánesinde dodalaǵan hám shártnamǵa qol qoyısqan edi.
Usı birge islesiw shártnaması tiykarında nátiyjeli jumıslar orınlanbaqta. Dáslep QMU da ótkerilgen “Túrkiy xalıqlar filologiyası” boyınsha ótkerilgen xalıq aralıq konferenciyada Ege universitetinen professor-oqıtıwshılar ózleriniń ilimiy maqalaları menen qatnasqan bolsa, soń eki oqıtıwshısı qaraqalpaq filologiyası hám jurnalistika fakultetinde magistrantlarǵa sabaq berdi.
Eki universitet basshıları oqıtıw hám ilimiy jumıslar alıp barıw boyınsha birge islesiw shártnamasına bola eki universitet basshılıǵında xalıq aralıq konferenciyalar otkeriw rejelestirilgen edi. Ege universitetiniń “Túrkiy xalıqlar dúniyası” institutınıń 30 jıllıǵı múnásiybeti menen ótkerilgen “Túrkiy dúniyası sociallıq bilimler simpoziumı”nda universitetimizdiń jurnalistika kafedrası docent Bakhitbay Paluanov óziniń “Last reforms of Journalism Education in Uzbekistan” degen atamadaǵı prezentaciyası menen onlayn formatta qatnastı.
Sonday-aq, bul shártnama tiykarında Qaraqalpaq mámleketlik universitetiniń professor-oqıtıwshıları xızmet saparı menen Ege universitetinde bolıwına, studentler bolsa, qospa tálim ham student almasıw baǵdarında oqıwlarına keń jol ashılǵan edi. Usıǵan bola, QMU dıń yuridika fakultetiniń kafedra baslıǵı M.Najimov basshılıǵındaǵı studentler delegaciyası Ege universiteti rektorı, professor Nekdet Budak qabıllawında bolıp, QMU rektorı professor Axmed Reymovtıń sálemnamasın jetkerdi.
QMU baspasóz xızmeti
