Búgin 5-dekabr kúni Qaraqalpaq mámleketlik universitetinde jaslardıń baslamaların qollap-quwatlaw boyınsha ámelge asırılıp atırǵan is-ilajlardı jáne de jedellestiriw, olardı ilimiy dóretiwshilik islerine keńnen tartıw maqsetinde ushırasıw bolıp ótti. Onda Ózbekstan Respublikası qábiletli jaslardı qollap-quwatlaw “Uluǵbek fondı” bas qánigesi J.Ergashev, Qaraqalpaqstan Respublikası Xalıq bilimlendiriw ministri orınbasarı Sh.Tadjimuratov, Qaraqalpaqstan Respublikası aymaqlıq innovaciyalıq rawajlanıw basqarmasınıń Innovaciyalıq infradúzilmeni rawajlandırıw boyınsha jetekshi qánigesi M.Ikmetov hám Nókis qalası, Nókis, Taqıyatas, Xojeli rayonlarında jaylasqan mekteplerdiń ruwxıylıq-aǵartıwshılıq isleri boyınsha direktor orınbasarları qatnastı.
Ushırasıwda “Uluǵbek fondı” bas qánigesi J.Ergashev hám Qaraqalpaqstan Respublikası aymaqlıq innovaciyalıq rawajlanıw basqarmasınıń Innovaciyalıq infradúzilmeni rawajlandırıw boyınsha jetekshi qánigesi M.Ikmetov sózge shıǵıp, 2023-jılda ótkeriletuǵın “Mırza Uluǵbek miyrasxorları” kórik-tańlawınıń maqseti hám wazıypaları, ótkeriliw tártibi, bahalaw kriteriyaları menen keńnen tanıstırdı sonday-aq, tańlawdıń respublikamız jaslarınıń dóretiwshilik imkaniyatların júzege shıǵarıwdaǵı áhmiyetin atap ótti. Ushırasıw qatnasıwshıları kún tártibindegi máseleler boyınsha ózlerin qızıqtırǵan sorawlarına tiyisli juwapların aldı.
