Berdaq atındaǵı Qaraqalpaq mámleketlik universitetiniń Qurılıs fakultetinde qurılıs kárxanaları, joybarlaw mekemeleri hám Qaraqalpaqstan Respublikası Suw xojalıǵı ministrligi wákilleri qatnasıwında ushrasıw bolıp ótti. Ushrasıwdı fakultet dekanı T.Uzaqov ashıp berdi hám qatnasıwshılarǵa fakultetimizde házirde tayarlanıp atırǵan bakalavr baǵdarları hám studentlerimiz haqqında aytıp ótti.

Fakultet studentleriniń qánigelik ámeliyatları bakalavr baǵdarlarına sáykes qurılıs kárxanalarında ótkeriliwi nátiyjeli jolǵa qoyılǵanlıǵı, ámeliyat dáwirinde olar kárxanalar tárepinen jumıs penen qamtılǵanlıǵın atap ótti. Sonıń menen birge fakultetimiz bazasında jańadan ashılıp, zamanagóy ásbap-úskineler menen támiyinlengen “Qurılıs materialları” laboratoriyası haqqında da qatnasıwshılarǵa maǵlıwmat berdi.

Bunnan soń jumıs beriwshi kárxanalardıń wákilleri de sózge shıǵıp, óz kárxanaları haqqında, ondaǵı bos jumıs orınları, qurılıs tarawındaǵı ámelge asırılıp atırǵan keń reformalar, búgingi kúnde qurılısshı kadrlardıń aldında turǵan zamanagóy wazıypalar, kárxanada sheshiliwin talap etip turǵan mashqalalar haqqında tolıq maǵlıwmatlar berdi. Sonday-aq olar búgingi kúnde studentlerge joybarlaw tiykarları hám smeta hújjetleri haqqında maǵlıwmatlar beriwshi pánlerdi keńirek oqıtıwdı yamasa oqıw baǵdarlamalarınıń mazmunına kiritiwdi usınıs etti. Ushrasıw sońında kárxana wákilleri hám professor-oqıtıwshılar arasında óz-ara pikirler almasıldı. 

Oqıw isleri boyınsha dekan orınbasarı: A.Baubekov