Biz búgin xalıqshıl hám demokratiyalıq principlerge tiykarlanǵan Jańa Ózbekstan mámleketin, erkin puqaralıq jámiyetti qurmaqtamız. Usı maqsette mámleket hám jámiyetimizdiń siyasiy huqıqıy fundamentin bekkemlew, mámleketti modernizaciyalaw, bul processte parlament hám siyasiy partiyalardıń rolin, jámiyetshilik qadaǵalawdı kúsheytiwge qaratılǵan keń kólemli demokratiyalıq reformalar jedel ámelge asırılmaqta.
Bársheńizdiń xabarımız bar 2022-jılı 20-dekabr kúni Ózbekstan Respublikası Prezidenti Shavkat Mirziyoev Oliy Májilis hám Ózbekstan xalqına múrájat qıldı. Múrájatnamada Prezidentimiz Ózbekstan dep atalatuǵın úlken hám tatıw shanaraqtıń hár bir aǵzası tınısh ham abadan ómir súriw ushın zárúr sharayatlar jaratıw jolında tınımısız izlenip atırmız dep aytıp ótti. Sonıń menen birge keń kólemli hám nátiyjeli reformalarımızdıń nátiyjesinde jalpı ishki ónim birinshi márte 80 milliard dollardan astı. Ekonomikamızǵa usı jıldıń ózinde 8 milliard dollarlıq tikkeley sırt el investiciyaları kirip keldi, eksportımız bolsa 19 milliard dollarǵa jetti. Bunday úlken nátiyje aldın bolmaǵanlıǵın aytıp ótti. Bunnan tısqarı Prezidentimiz óz múrájatnamasında biz bıyıl tariyxımızda birinshi márte pensiya ham sociallıq napaqalardıń muǵdarın minimal tutınıw qárejetlerinen az bolmaǵan dárejege alıp shıqtıq. Mısalı 2017-jılı kem támiyinlengen 500 mıń shańaraq sociallıq járdem alǵan bolsa, búginge kelip 2 millionnan aslam shańaraqlarǵa járdem berilmekte. Ajıratılıp atırǵan qarjılar bolsa, 7 esege kóbeytilip, jılına 11 trillion sumǵa jetti.
Biz miynet haqı, pensiya hám napaqalardıń muǵdarın, xalıqtıń jan basına dáramatların artırıw siyasat izbe-iz dawam ettiremiz.Keyingi 6 ayda mámleketimiz boyınsha derlik 300 mıń yamasa aldınǵı jıllarǵa salıstırǵanda 10 ese kóp turaq jaylar qurıldı. Bul dáwirde qosımsha 500 mıń oqıwshı ornı jaratılıp, oladıń jámi sanı 5 million 300 mıńǵa jetti. Házirgi waqıtta jáne 1 million 200 mıń oqıwshı ornın jaratıw boyınsha jumıslar alıp barılmaqta. Xalqımızdıń den sawlıǵın saqlaw ushın barlıq medicinalıq xızmetlerdi eń alıs rayon hám máhálleler dárejesine shekem túsirip atırmız. Adamlardı kásip-ónerli etiw, olardıń biznesine keń jol ashıw, haqıyqıy múlik iyesi bolıp, dáramat tabıw ushın zárúrli sharayatlardı jaratpaqtamız dep aytıp ótti.
Múrájatnamada mámleketmiz rawajlanıwın jańa basqıshqa alıp shıǵıw ushın basqarıwda, nızamshılıqta, jámiyetimizde ózgeris bolıw kerekligi óz aldına aytılıp ótildi. Eger solay etpesek, mashqalalardı kórip kórmeslikke alsaq, zamannan artta qalamız. Xalqımız jas awlad bizden razı bolmaydı. Sonday-aq, Prezidentimiz múrájatnamada hárbir tarawǵa óz aldına toqtalıp, qılınǵan, qılınıp atırǵan, eń tiykarǵısı, 2023-jılda ámelge asırılıwı hám itibar qılınıwı zárúr bolǵan altı baǵdar boyınsha óz usınısların bildirdi hám 2023-jıldı elimizde «Insanǵa itibar hám sapalı bilimlendiriw jılı» dep atama beriwdi usınıs etti. Juwmaqlap aytqanda, Ózbekstan Respublikası Prezidentiniń 2022-jıl 20-dekabrdegi Parlament hám xalqımızǵa jollaǵan múrájatnaması insan qádiri hám onıń máplerin hár tárepleme támiyinlewge qaratılǵan jańa qádemniń ámeliy kórinisi bolıp esaplanadı.
Ekonomika fakulteti dekanı T.Jiemuratov
