Prezidentimiz Shavkat Mirziyoevtıń Oliy majliske hám Ózbekstan xalqına jollaǵan Múrájatı bolıp ótti. Bul Múrájatta 2023-jılǵa elimizde «Insanǵa itibar hám sapalı bilimlendiriw jılı» dep atama beriwi jıynalǵanlar tárepinen bir dawıstan qollap-quwatlandı.

«Ne ushın jılǵa bunday atama berip atırmız?» – degen sorawǵa juwap retinde el basshımız bılay talqıladı: «Biz Ózbekstanda alıp barıp atırǵan mámleketlik siyasattıń orayında insan hám onıń máplerin támiyinlewdi aldaǵı wazıypa etip belgiledik. Negizinde de solay, biziń eń biybaha baylıǵımız, bul – xalqımız, ata-analarımız, náwqıran áwladlarımız. Bul elde jasap atırǵan hár bir insannıń tınısh hám baxıtlı turmıs keshiriwi, onıń den sawlıǵı bekkem bolsa, jaqsı bilim alıwı, shańaraǵın baǵıwı ushın qanday sharayat jaratıw kerek bolsa, hámmesin jaratıp beriwge háreket etemiz hám bul joldan qaytpaymız» degen edi.

Búgingi globallasıw dáwirinde insan qádiri, milletler hám dinler arasındaǵı múnásibet máseleleri jámiyetimiz rawajlanıwınıń oǵada áhmiyetli qubılısları sıpatında júzege shıqpaqta. Dúnya xalıqlarınıń rawajlanıw tájiriybesi sonı kórsetedi, puxaralar, milletler hám dinler aralıq tatıwlıqtı támiyinlew – jámiyettiń tabıslı alǵa ilgerilewiniń tiykarǵı shárti hám zárúr nızamlılıǵı bolıp esaplanadı. Bul qaǵıydanı basshılıqqa alǵan Ózbekstan respublikası prezidenti búgingi dáwirdegi jaǵdaydı bahalay otırıp, bılay dedi: «Házirgi waqıtta dúnyanıń túrli regionlarında milletler hám dinler arasındaǵı keskinlik kúsheyip barmaqta, milletshilik, diniy qarsılıqlar bas kótermekte. Bul illetler mámleketti jemirip, jámiyetti bóleklep, radikal topar hám aǵımlar ushın ideologiya bazasına aylanbaqta». 

Sonday-aq, prezidentimiz Sh.Mirziyoev atap kórsetkenindey, «hámmemizge belgili, rawajlanıwdıń tırnaq tasıda, mámleketti qúdiretli, millettti ullı etetuǵın kúsh te bul – ilim, tálim hám tárbiya. Ertengi kúnimiz, watanımızdıń jarqın keleshegi, birinshi gezekte bilimlendiriw sisteması hám perzentlerimizge berip atırǵan tárbiyamız benen tıǵız baylanıslı», dep keltirip ótedi. Sonlıqtan da, prezidentimiz búgingi jollaǵan múrájatında bilimlendiriw tarawına baylanıslı bir qansha baǵdarlamalardı aytıp ótti. Sebebi, mektepti ózgertpey turıp, adamdı, jámiyetti ózgertip bolmaydı. Bilimlendiriw hám tárbiyanıń tiykarı, tırnaq tası bul – mektep. Mektepti mektep etetuǵın kúsh bolsa muǵállimler bolıp esaplanadı, – degen edi elimiz basshısı. Bilimlendiriw sapasın arttırıw – jańa Ózbekstannıń birden bir tuwrı jolı ekenligin, tiykarǵı reformalardı bilimlendiriw sistemasınan, baqsha, mektep, tárbiya máselesinen baslaytuǵınlıǵın atap ótti.

Prezidentimiz Sh.Mirziyoev óz múrájatında professional tálim tarawlarınada toqtalıp ótti. Kásip-óner tálimi menen qamrap alıw 200 mıńǵa jetkeriledi. 2023-jılda mámleketlik grantlar ushın 130 mıń orın ajıratıladı. Bul usı jıldaǵıdan 30 mıńǵa kóp. Hár bir walayatta 1 texnikumda jaslar Evropa kásip tálimi standartları tiykarında oqıtıladı. Kelesi bes jılda barlıq kolledj hám texnikumlar Evropa kasiplik tálim standartları tiykarında oqıtıladı.

El basshımız atap ótkenindey, «kólemi hám shegarası barǵan sayın keńeyip baratırǵan bunday ámeliy jumıslarımız jańa Ózbekstandı payda etiw, mámleketimizde Úshinshi Renessanstıń fundamentin jaratıw, watanımızdıń gúlleniwi, xalqımızdıń parawanlıǵın arttırıwday ádiwli maqsetlerimizge uyǵın hám pikirles ekenligi, ásirese, itibarlı. Biz xalqımız, bárinen burın jas áwladımız, sonday-aq, jáhán jámiyetshiligine islam dininiń insansúyiwshilik mánisin jetkeriwde eń áhmiyetli wazıypa dep esaplaymız». Muqaddes islam dininiń insansúyiwshilik din ekenligin, adamzattı joqarı mánawiyatqa hám bilimlilikke shaqıratuǵınlıǵın, alım hám ulama ata-babalarımızdıń birinshi hám ekinshi Renessanstıń dóretiwshilerinen bolǵanlıǵın izertlew hám násiyatlaw búgingi kúndegi áhmiyetli wazıypalardan sanaladı.

Maqalamızdı prezidentimiz Shavkat Mirziyoevtıń pikiri menen juwmaqlap aytqanda, jas áwlad tálim-tárbiyasına kúshli dıqqat-itibarlı bolıw, sonday-aq, elimizde jasap atırǵan barlıq millet hám elatlar arasında óz-ara húrmet hám awızbirshilik ortalıqtı bekkemlew, túrli diniy konfessiyalar ushın teń hám qolaylı sharayat jaratıwǵa qaratılǵan siyasat izbe-iz dawam ettiriledi.   

Kórkem-óner fakulteti dekanı H.Ótegenov