Húrmetli Prezidentimiz aytqanınday rawajlanıwdıń tiykarǵı irge tası da, mámleketti qúdiretli etetuǵın, milletti ullı etetuǵın kúsh bul, ilim, tálim hám tárbiya bolıp tabıladı degen edi. Usı tiykarda Berdaq atındaǵı Qaraqalpaq mámleketlik universitetinde oqıw procesinde alda turǵan tiykarǵı wazıypalardı belgilep alıw hám tálim-tárbiya sapasın jaqsılawǵa baǵıshlanǵan ilaj bolıp ótti.
Ilajda universitetimizdiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, korrupciyaǵa qarsı gúresiw, komplaens qadaǵalaw bólimi baslıǵı K.Uteniyazov, jaslar menen islesiw, ruwxıylıq hám aǵartıwshılıq bólimi baslıǵı Q.Beknazarov, sonday-aq, profilaktika inspektorları, psixolog, jaslar awqamı jetekshisi, studentlerdi turaq jay menen támiyinlew jumısların muwapıqlastırıw bóliminiń juwapkerleri, barlıq fakultet dekanlarınıń jaslar máseleleri boyınsha orınbasarları menen birgelikte tyutorları qatnastı.
Ilajda dáslep universitetimizdiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov sózge shıǵıp, mámleketimiz tárepinen bilimlendiriw sistemasında alıp barılıp atırǵan jumıslar, ámelge asırılıp atırılǵan reformalar, jaslarımızǵa berilip atırılǵan imkaniyatlardı student-jaslarımız arasında keń túrde úgit-násiyatlaw, olardıń tálim-tárbiyasına, keleshekte mámleketimizdiń rawajlanıwına úles qosatuǵın jetik kadrlar bolıp jetilisiwinde hámme teńdey juwapker ekenligin aytıp ótti.
Bunnan soń, sózge shıqqanlar fakultetlerde tyutorlardıń studenler menen islesiwi qanaatlandırarsız ekenligi, ayrım tyutorlar óz wazıypasına nemquraylıq penen qarap júrgenligin qatań sınǵa alıp, bunday jaǵdaylardı boldırmaw maqsetinde, aldaǵı waqıtları studentler menen hám olardıń ata-anaları menen tıǵız baylanıs ornatıp, olardıń bos waqıtların mazmunlı ótkeriw, jataqxanalarda hám ijarda turatuǵın studentlerden turaqlı ráwishte xabar alıp turıw kerek ekenligin aytıp ótti. Sonıń menen birge, ilajda tyutorlardıń pikir usınısları tıńlanıp, aldaǵı waqıtlar student-jaslar menen elede tıǵız baylanıslar ornatıw maqsetinde tiykarǵı wazıypalar belgilep alındı.
QMU Baspasóz xızmeti
