Tártip intizam hám juwapkershilikti kúsheytiw, jınayatshılıqtıń aldın alıw ortalıǵın bekkemlew – huqıqbuzarlıqlar profilaktikası nátiyjeliliginiń tiykarǵı faktorı bolıp esaplanadı.
Búgin 7-fevral kúni Dene mádeniyatı fakulteti hám Tariyx fakulteti student-jasları, isshi xızmetkerleri, professor-oqıtıwshıları arasında jınayatshılıq hám huqıqbuzarlıqtıń aldın alıw, oǵan qarsı gúresiw hám de olar arasında profilaktikalıq úgit-násiyatlaw jumısların alıp barıw maqsetinde «Huqıqbuzarlıq hám jınayatshılıqqa qarsı birgelikte gúresemiz!» atamasında profilaktikalıq úgit-násiyatlaw ilajı ótkerildi.
Ilajǵa Dene mádeniyatı fakulteti dekanı N.Kaypov, Tariyx fakulteti dekanı S.Sulaymanov, Nókis qalalıq IIOJM basqarması baslıǵı, polkovnik Z.Zaytov, QR IIM JHQB xızmetkerleri, Nókis qalası 3-sanlı IIB baslıǵı, podpolkovnik A.Babadjanov, QMU profilaktika inspektorı, kapitan I.Erejepov, dekan orınbasarları, professor-oqıtıwshılar, tyutorlar hám student-jaslar qatnastı.
Ilajda bayanatshılar «Jaslar arasında, ásirese, studentler arasında júz berip atırǵan huqıqbuzarlıq hám jınayatshılıqtı saplastırıw máseleleri», «Jol háreketi yaki transportlardan paydalanıw qáwipsizligi qaǵıydaları», «Jawızlıqqa qarsı aǵartıwshılıq», «Sociallıq tarmaqlar yaki kiberqáwipsizlik haqqında túsinik» atamalarındaǵı óz bayanatların oqıp esittirip, huqıqbuzarlıq hám jınayatshılıqtıń aldın alıw boyınsha mámleketimizde bir qansha reformalar ámelge asırılıp atırǵanlıǵı, qabıl etilip atırǵan huqıqıy-normativ hújjetler, jaslardıń huqıqıy mádeniyatın joqarılatıw, puqaralardıń nızamǵa boysınıwları, huqıqbuzarlıq hám jınayatshılıqqa qarsı gúresiw arqalı jámiyetlik tártipti hám qáwipsizlikti saqlaw máseleleri, jınayatshılıqtıń erte aldın alıw zárúrligi, jámiyette júris-turıs qaǵıydaları, jol transport háreketi hám onnan paydalanıw qáwipsizligi qaǵıydaları, júz beriwi múmkin bolǵan huqıqbuzarlıqlar aqıbetinde elimiz ekonomikasına keltiriletuǵın zıyanlar, búgingi kúnde jaslar tárepinen islenip atırǵan jınayatlar, kafe-restoranlarda spirtli ishimlikler iship jánjellesiw halatları, avtoavariyalar, bir-birine dene jaraqatların jetkeriw hám basqa da hár túrli jınayıy islerge qol urıp, jınayıy juwapkershilikke tartılıwdıń aqıbetleri, sonday-aq, puqaralar tárepinen islengen huqıqbuzarlıq hám jınayatlardı anıq faktler menen atap ótti.
Ilaj dawamında huqıqıy máseleler boyınsha ilaj qatnasıwshıları ózleriniń qızıqtırǵan sorawlarına taraw qánigelerinen tiyisli juwaplar aldı.
Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
