Berdaq atındaǵı Qaraqalpaq mámleketlik universiteti Qaraqalpaq filalogiyası hám jurnalistika fakultetinde Málimleme xızmeti hám jámiyetshilik penen baylanıslar qánigeligi 2-3-kurs student-jasları menen birgelikte Qaraqalpaqstan teleradiokompaniyasında jumıs alıp barıwshı jurnalistler menen ushırasıw shólkemlestirildi.

Ushırasıwda Qaraqalpaqstan telekanalı «Saz-sáwbetli dem alıs hám kino baǵdarlamaları «bas redakciyası bólim baslıǵı, tájiriybeli jurnalist Zuxra Ábdiraxmanova, Qaraqalpaqstan radiokanalı «Jámiyetlik sıyasıy hám sotcial-ekonomikalıq baǵdarlamalar» bas redaktorı orınbasarı, «Altın qálem» sıylıǵınıń laureatı Artıqgúl Ayımbetova, Jurnalistika kafedrası oqıtıwshısı, filalogiya ilimleriniń kandidatı, docent Zıyada Qojıqbaeva, tyutor Gúlaysha Utegenova hám student-jaslar qatnastı.

Ushırasıw barısında student-jaslarǵa jurnalistika tarawınıń ózine tán tárepleri, ǴXQ da jurnalistlerdiń tiykarǵı xızmetı, televideniyede kewil-ashar dástúrler tayarlawdıń baslı ózgeshelikleri, tarawdaǵı házirgi mashqalalar, jumıs procesinde ushırasıp turatugın hár túrli qıyınshılıqlar, radiokanalda tuwrıdan-tuwrı efir juwapkershiligi, jumıs dawamında ushırasıp turatuǵın qızıqlı waqıyalar haqqında erkin sáwbetlesiwler alıp barıldı.

Student-jaslar radio hám televideniyede jaslarǵa arnalǵan baǵdarlamalardıń tematikası, ózlerin qızıqtırǵan máseleler boyınsha sorawlar berdi. Jurnalistler tárepinen sorawlarǵa keń kólemde juwaplar berildi.

A.Kalmurzaeva Málimleme xizmeti hám jámiyetshilik penen baylanislar qánigeli 2a-kurs studenti.