Usı jıldıń 10-fevral kúni Qaraqalpaq mámleketlik universitetiniń Shet tiller fakulteti inglis tili hám ádebiyatı kafedrası tárepinen Ózbekstan Respublikası hám de Koreya Respublikası menen birgelikte «Átirap ortalıqtı qorǵaw hám qayta tiklew» atamasında xalıq aralıq konferenciyası shólkemlestirildi. Bul xalıq aralıq konferenciyada universitetimizdiń Xalıq aralıq baylanıslar boyınsha prorektorı T.Nurımbetov, Shet tiller fakulteti dekanı Dj.Kurbanbayevlar sózge shıǵıp, búgingi konferenciyaǵa kelgen mıymanlardı KUSSO (Korea University Social Service Organization) universiteti wákilleri Professor Do Seon Eur, Chuntaek Yim, Djemma Kim, sonıń menen birge, Koreya universiteti studentlerin tanıstırıp ótti.
Házirgi waqıtta Aral teńizi insan iskerligi nátiyjesinde júzege kelgen ekologiyalıq mashqalaǵa aylandı. Búgingi xalıq aralıq konferenciya járdeminde biz Aral teńizin qutqarıwda qatnasıw hám bul processtiń áhmiyetin túsindiriw ushın barlıq student-jaslardı belsene qatnasıwǵa shaqırıp qalamız. Óytkeni, Aral teńiziniń qurıwı tekǵana Qaraqalpaqstan ushın emes, al bálkim pútkil dúnya gúresiwi zárúr bolǵan mashqala esaplanadı.
Konferensiyanıń birinshi bóliminde Aral teńizi, Aral boyı hám oǵan tutas bolǵan aymaqlardıń ekologiyalıq jaǵdayı haqqında informaciyalıq hám ilimiy bayanatlar tıńlanıp, Shet tiller fakulteti studentleri tárepinen de Aral teńizi haqqında prezentaciya tayarlanıp, bul Koreya Respublikasinan kelgen miymanlardıń itibarın tarttı.
Konferensiya qatnasıwshıları barlıq shólkemlestiriwshilerge óz minnetdarshılıq bildirip, olarǵa estelik sawǵaları Inglis tili hám ádebıyatı kafedrası jámááti atınan berildi. Bunday ilajlar xalıq aralıq student-jaslardı birlestirip qoymastan, eń áhmiyetlisi, ózimiz jasap turǵan qorshaǵan átiraptı qorǵaw ushın global ózgerislerdi jaratıwǵa shaqıradı.
