1-fevral hám 1-mart aralıǵı «Jaslar arasında náshebentlik hám psixotrop zatlardıń aylanısına qarsı gúresiw aylıǵı» múnásibeti menen 17-fevral kúni Qaraqalpaq mámleketlik universiteti student-jasları arasında sporttıń Workout túri boyınsha jarıs ótkerildi.

Jarısqa universitet studentlerinen ibarat 10 komanda (er balalar 6 komanda, qızlar 4 komanda) qatnastı. Jarıs qızǵın bellesiwlerge bay bolıp, jaslardıń Workout sport túrine bolǵan qızıǵıwshılıǵı, olardıń sport (jarıs shártleri: (30 sekund ishinde) turnikke tartılıw, (30 sekund ishinde) brusyada qollardı búgip jazdırıw, (30 sekund ishinde) otırıp turıw, (30 sekund ishinde) edende tayanıp jatıp, qollardı búgip jazdırıw) sheberlikleri sınaldı.

Jarısqa tájiriybeli sportshılar, dene mádeniyatı teoriyası hám metodikası kafedrası oqıtıwshıları N.Akimov, A.Qazaqbaev, S.Eliusinov, M.Abdimuratov, M.Xalmuratovlar tóreshilik etti. Jarıs tóreshiler tárepinen tárepinen ádil bahalanıp, er balalar arasında I-orındı dene mádeniyatı tálim baǵdarınıń 3-kurs studentleri, II-orındı dene mádeniyatı tálim baǵdarınıń 1-kurs studentleri, III-orındı sırtqı bólim studentleri jeńip alǵan bolsa, al qızlar arasında I-orındı hayal-qızlar sportı tálim baǵdarınıń 4-kurs studentleri, II-orındı hayal-qızlar sportı tálim baǵdarınıń 1-kurs studentleri, III-orındı hayal-qızlar sportı tálim baǵdarınıń 3-kurs studentleri jeńip alıwǵa miyasar boldı.

Jarıs jeńimpazları shólkemlestiriwshiler tárepinen tayarlanǵan estelik sawǵaları menen sıylıqlandı. Ótkerilgen jarıstıń studentler arasında sporttıń Workout túri boyınsha jarıs ótkeriw arqalı student-jaslar arasında salamat turmıs tárizin qáliplestiriw, universitet kóleminde Workout sport túrin rawajlandırıw hám en jaydırıw, olardıń sport sheberligin asırıw, qábiletli sportshı studentlerdi anıqlaw bolıp tabıladı.

R.Óteniyazov

Dene mádeniyatı fakultetiniń

jaslar menen islesiw boyınsha dekan orınbasarı