Usı jıldıń 18-19-fevral kúnleri Berdaq atındaǵı Qaraqalpaq mámleketlik universiteti jámááti hám bir qatar belsendi student-jaslar Aral teńiziniń ultanında «Jasıl qaplamalar» payda etiw boyınsha ámelge asırılıp atırǵan jumıslarǵa óz úlesin qosıw, sonday-aq, universitet belsendi student-jasları tárepinen “Ullı keleshekti Moynaq jasları menen birgelikte quramız!” uranı astında ilaj shólkemlestiriw maqsetinde eki kún dawamında Moynaq rayonında boldı.
Dáslep universitet jámááti hám belsendi student-jasları Aral teńizi tariyxı muzeyi menen tanısıp, ol jerdegi bay tariyxıy miyraslar, Aral teńizi menen baylanıslı eksponantlar menen keńnen tanıstı. Bunnan soń, Kemeler qábiristanı ashıq aspan astındaǵı múzeyinde bolıp, ol jerde universitetimizdiń dóretiwshi studentleri tárepinen suwsız qalǵan kemeler hám tábiyat kórnislerin óz kartinalarında sáwlelendirdi. Sonıń menen birge, universitet jámááti hám belsendi student-jaslar tárepinen Moynaq rayonındaǵı “Aq keme” balalar dem alıw orayında “Elimizde milletler aralıq doslıqtı, keńpeyillikti hám tınıshlıqtı súyemiz!” súreni astında saz-sáwbet keshesi hám baqsılar qatnasıwında mádeniy ilaj ótkerildi. Sonday-aq, sońǵı jılları Ózbekstan Respublikası Prezidentiniń baslaması menen Araldıń qurǵaǵan ultanında toǵayzarlıq payda etiw boyınsha keń kólemli jumıslar alıp barılıp, atap aytqanda 2018-2022-jıllar dawamında jámi 1 mln. 624 mıń gektar maydanlarǵa seksewil nálleri egilgen. Usınday iygilikli islerdi dawam ettiriw maqsetinde 19-fevral kúni Berdaq atındaǵı Qaraqalpaq mámleketlik universitetiniń bir topar student-jasları professor-oqıtıwshılar Araldıń qurǵaǵan ultanında seksewil nállerin egiw menen birge ilim-izertlew jumısların alıp bardı.
Ol jerde universitettiń Biologiya fakulteti janındaǵı Bioekologiya ilmiy laboratoriya ásbap úskeneleri járdeminde hawanıń, topıraqtıń quramın anıqlaw, sonday-aq, ekologiyalıq jaǵdaydı jaqsılaw maqsetinde 9 mıńnan aslam seksewil hám jıńǵıl nálleri, 50 kg seksewil, 50 kg qarabaraq tuqumları egildi. Ilajda Oliy Majlis Senatınıń Aralboyı aymaǵın rawajlandırıw máseleleri komiteti baslıǵınıń orınbasarı, senator B.Matmuratov, Qaraqalpaqstan Respulikası Innovaciyalıq rawajlanıw aymaqlıq basqarmasınıń baslıǵı N.Kayupov, Berdaq atındaǵı Qaraqalpaq mámleketlik universiteti rektorı A.Reymov, Ájiniyaz atındaǵı Nókis mámleketlik pedagogikalıq institutı rektorı B.Otemuratovlar qatnasıp, Aral teńizindegi ekologiyalıq apatshılıqtıń aldın alıw, hawaǵa kóterilip atırǵan duzlardıń tarqalıwın kemeytiw hám bunda shólge shıdamlı ósimliklerdi kóbirek egiw, egilgen seksewil nálleriniń qorshaǵan ortalıǵımız ushın áhmiyeti haqqında aytıp, student-jaslarǵa bunday iygilikli jumıslarǵa óz úlesin qosıp atırǵanı ushın minnetdarshılıq bildirdi.
Haqıyqatında da bunday ilajlardı ótkeriwden tiykarǵı maqset Ana tábiyattı asıraw, tábiyǵıy resurslardan aqılǵa uǵras paydalanıw, sonday-aq, jer, suw, toǵay, atmosfera hawasın, ósimlikler hám haywanatlar dúnyasın qorǵaw, olardı zıyanlanıwdan, joq bolıp ketiwiniń aldın alıw boyınsha, student-jaslarǵa túsindiriw jánede tábiyatımızdı asırıwǵa óz úlesimizdi qosıw bolıp tabıladı deydi- Biologiya fakulteti dekanı, biologiya ilimleri doktorı, professor Yakub Ametov.
QMU Baspasóz xızmeti.
