Búgin 23-fevral kúni Berdaq atındaǵı Qaraqalpaq mámleketlik universitetinde Qaraqalpaqstan Respublikası Ishki isler ministri, polkovnik Baxtiyar Tórebekovtıń student-jaslar menen ushırasıwı bolıp ótti. Ushırasıwǵa barlıq fakultettiń jaslar máseleleri boyınsha dekan orınbasarları, tyutorlar, student-jaslar, ishki isler uyımlarınıń juwaplı xızmetkerleri hám profilaktikalıq inspektorları qatnastı.
Ushırasıwdı universitet rektorı A.Reymov basqarıp barıp, sonǵı jılları mámleketimiz tárepinen jınayatshılıq hám huqıqbuzarlıqqa qarsı gúresiw, korrupciya hám huqıqbuzarlıqlardıń aldın alıwǵa qaratılǵan is-ilajlardı jetilistiriw jumıslarına da ayrıqsha itibar qaratılıp atırǵanlıǵı, biraq elde kópshilik jaslar ózleri jınayatqa bilip bilmey aralasıp qalıp atırǵanlıǵın, bunday unamsız halatlarǵa jol qoymaw maqsetinde universitet kóleminde, fakultetlerde professor-oqıtıwshılar hám student-jaslardıń huqıqıy mádeniyatın hám bilimin asırıwǵa qaratılǵan hár túrli ilajlar ótkerilip kiyatırǵanlıǵın aytıp ótti.
Bunnan soń, Qaraqalpaqstan Respublikası Ishki isler ministri B.Tórebekov sózge shıǵıp, ol óz sózinde jaslar arasında ushırasıp atırǵan jınayatshılıq hám huqıqbuzarlıqlar ásirese studenler arasında kóp tarqalıp atırǵan telefon urlıqları, kafe-restoranlarda spirtli ishimlikler iship jánjellesiw halatları, bir-birine dene jaraqatların jetkeriw hám avtotransportlardan paydalanıp avariyalıq jaǵdaylardıń kelip shıǵıwı, jol qaǵıydalarına boysınbastan jol háreketin buzıp insan salamatlıǵına hám ómirine qáwip tuwdırıwshı jaǵdaylar, sonıń menen birge búgingi kúnde keń tarqalǵan kiber jınayatı, onıń awır aqıbetleri haqqında túsindiririp ótti. Ushırasıwda jaslar arasında jınıyatshılıq hám huqıqbuzarlıqtıń aldın alıw hám profilaktikalıq ilajlardı bunnun bılayda kúsheytiw maqsetinde Qaraqalpaqstan Respublikası Ishki isler ministrligi hám Qaraqalpaq mámleketlik universiteti arasında birge islesiw «Memorandum hújjeti»ne qol qoyıldı.
Memorandumnıń maqseti Qaraqalpaqstan Respublikası Ishki isler ministrligi menen Qaraqalpaq mámleketlik universiteti arasında joqarı qánigeli kadrlardı tayarlaw tarawında jaqınnan birge islesiwdi jolǵa qoyıw, universitet studentlerin Qaraqalpaqstan Respublikası Ishki isler ministrligi iskerligine, atap aytqanda tergewdi shólkemlestiriw, tergew háreketlerin ótkeriw, profilaktika iskerligi, probaciya tarawı, tiyisli hújjetler joybarların tayarlaw hám basqa iskerliklerge qatnastırıw arqalı huqıqtı qollaw ámeliyatın úyretiw, iskerliktiń tiykarǵı baǵdarları menen tanıstırıw maqsetinde, Qaraqalpaqstan Respublikası Ishki isler ministrliginde universitetimiz studentleri ushın seminarlar, konferenciyalar, dóńgelek stol sáwbetleri, ashıq esikler kúnlerin ótkeriwden ibarat. Ilajda student-jaslar jınayatshılıqtı boldırmaw hám onıń aldın alıw boyınsha óziniń pikir usınısların bildirdi.
QMU baspasóz qızmeti
