Berdaq atındaǵı Qaraqalpaq ádebiyatı, tariyxı mámleketlik muzeyinde Qaraqalpaqstan ǵalaba xabar quralları, baspasóz tarawında óziniń pidayı miyneti menen respublikamızda, ulıwma jámiyette óziniń pidayı miyneti menen iz qaldırǵan jurnalist Quyash Yusupovtıń tuwılǵanına 70 jıl tolıwı múnásibeti menen eslew keshesi ótkerildi. Keshege Q.Yusupov penen birge islesken kásiplesleri, dosları, ul-qızları, talantlı jurnalistler hám student jaslar qatnastı.
Dáslep keshede Quyash Yusupovtıń ómir jolı tilge alınıp , dóretiwshilik miynetleri haqqında aytıp ótildi. Ol orta mektepti pitkerip, 1973- jılı Tashkent mámleketlik universitetiniń jurnalistika fakultetin tabıslı tamamlap, dáslepki miynet jolın «Qaraqalpaqstan jasları» gazetasında ápiwayı xabarshı bolıp islewden baslaydı. Respublika jaslarınıń turmısınan jazılǵan maqalaları gazeta betlerinde jarıq kórine baslaydı. Joqarı talantına, bilimine hám sheber shólkemlestiriwshilik uqıbına baha bergen respublika basshıları onı jetekshilik jumıslarǵa tartıp basladı. «Sovet Qaraqalpaqstan», «Erkin Qaraqalpaqstan » gazetalarında juwaplı xatker hám bas redaktor lawazımparında jumıs isleydi. Gazetanıń mazmunlı, dizaynı jaqtan shıraylı hám oqıwshılarınıń kewlinen shıqqanday maqalalardı shıǵarıwda hámmeni hayran qaldıratuǵın edi. Tınımsız miynet, jaqsı islengen jumıslar hesh waqıtta jerde qalmaydı álbette.
Quyash Yusupov Qaraqalpaqstan jurnalistikasınıń, ásirese baspasóz tarawınıń rawajlanıwına xızmetleri húkimetimiz tárepinen ılayıqlı bahalanıp bir-neshe orden, medallar, húrmet jarlıqları menen sıylıqlanǵan bolsa, 1996-jılı oǵan» Qaraqalpaqstan Respublikasına miyneti singen jurnalist » húrmetli ataǵı beriledi.
Keshe dawamında Qaraqalpaqstanǵa miyneti singen jurnalist E.Ermanov Ózbekstanǵa xızmet kórsetken jurnalist, Qaraqalpaqstan jurnalistler awqamınıń baslıǵı K.Reymov, satirik shayır, jazıwshı M.Nızanov, Qaraqalpaqstanǵa xızmet kórsetken jurnalist, «Qaraqalpaqstan jasları» gazetasınıń redaktorı I.Qosnazarov, Qaraqalpaqstanǵa miyneti singen jurnalist Ó.Ótewliev, D.Bekbauliev , Q.Yusupovtıń ómirlik joldası hám bir qatar jurnalistler shıǵıp sóyledi.
Bul insanlar neshe jillar dawamında Q.Yusupov penen jurnalistika ásirese baspasóz tarawında ayanbay miynet islegen. Jumıs procesinde ushrasqan qıyınshılıqlar hám este qalarlıq waqıyalar yadqa alındı. Q.Yusupov búgingi kúnde aramızda bolmasada bul insannıń yadı hámishe ulıǵlanadı, keleshek-áwlad yadınan shıǵarmaydı.
Kalmurzaeva Ayman
Qaraqalpaq filologiyası hám jurnalistika fakulteti Málimleme xızmeti qánigeligi 2a – kurs studenti
