Berdaq atındaǵı Qaraqalpaq mámleketlik universiteti Ózbekstan hám Qaraqalpaqstan tariyxı kafedrası janında Akademik Sabır Kamalov atındaǵı ilimiy seminar bolıp ótti. Onda ilimpazlar professor-oqıtıwshılar, doktorantlar, magistrantlar hám student-jaslar qatnastı. Akademik Sabır Kamalov – Qaraqalpaqstan tariyxı iliminiń atası Ózbekstan hám Qaraqalpaqstanǵa xızmet kórsetken ilim ǵayratkeri, Óz IA Akademigi, tariyx ilimleri doktorı, professor S.K.Kamalov 1924-jılı 10-sentyabrde Qaraqalpaqstannıń Qaraózek rayonında tuwılǵan. 1942-jılı Xojeli pedagogika bilim jurtın, 1948-jılı Qaraqalpaqstan pedagogika institutınıń tariyx fakultetin tamamlaǵan. 2009-jılı dúnyadan ótti.

Ilimpazdıń miynetleri húkimetimiz tárepinen de joqarı bahalandı. Oǵan 1973-jılı “Qaraqalpaqstanǵa miyneti sińgen ilim ǵayratkeri”, 1974-jılı “Ózbekistan Respublikasına miyneti sińgen ilim ǵayratkeri” húrmetli ataqları berildi.
Ilimiy seminardı Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdımambetov óziniń kiris sózi menen ashıp berdi. Sonday-aq, Ózbekstan Respublikası Ilimler akademiyası Qaraqalpaqstan bólimi Qaraqalpaq gumanitar ilim-izertlew instituti direktorı M.Qarlıbaev S.Kamalovtıń ómiri dóretiwshiligi, jetiskenlikleri, ilim hám ómir jolındaǵı qıyınshılıqları haqqında qısqasha bayanat jasadı. Bunnan soń, «Ózbekstan hám Qaraqalpaqstan tariyxı» kafedrası professorı B.Qosjanov óz bayanatında S.Kamalov kóplegen tarawlardaǵı ilimpazlardıń ustazı ekenligin ayrıqsha atap ótti. Akademik S.Kamalov perzenti Yu.Kamalovta akesiniń ilimiy dóretiwshiligi, ilim jolında islegen miynetleri haqqında sonday-aq, bolıp ótken ilimiy-seminarda «Ózbekstan hám Qaraqalpaqstan tariyxı» kafedrası professor-oqıtıwshıları, erkin izleniwshi, 2-3-kurs doktorantlar hám magistrantlar óz bayanatları menen shıǵıp sóyledi hám ózleriniń ilimiy jumıslarınıń esabatların tapsırıp, professor-oqıtıwshılar aldında ilimiy jumısların qısqasha prezentaciya etip berdi.