Búgin Berdaq atındaǵı Qaraqalpaq mámleketlik universitetinde 8-mart — Xalıqaralıq hayal-qızlar bayramı múnásibeti menen ilaj bolıp ótti. Onda prorektorlar, fakultet dekanları, nuraniy ustazlar professor-oqıtıwshılar hám bir qatar taraw pidayıları qatnastı. Ilajda universitet rektorı A.Reymov sózge shıǵıp, búgingi kúnde mámleketimizde hayal-qızlardıń jámiyetlik-siyasiy hám sociallıq belsendiligin arttırıw, óz qábiletlerin júzege shıǵarıwı ushın sharayat jaratıw, olardıń huqıqlarım támiyinlew, analıqtı hám balalıqtı hár tárepleme qollap-quwatlaw, shańaraq institutın bekkemlew baǵdarında keń kólemli jumıslar ámelge asırılıp atırǵanlıǵın aytıp ótti. Sonday-aq, universitetimizde hayal-qızlar tárepinen qolǵa kirgizgen jetiskenlikler haqqında aytıp, bárshe hayal-qızlarımızdı báhár bayramı, jasarıw hám jańalanıw áyyyamı 8-mart — Xalıqaralıq hayal-qızlar bayramı menen qızǵın qutlıqladı.
Sonıń menen birge, ilajda bayram múnásibeti menen bir qatar hayal-qızlarımızǵa, universitetimiz rektorı tárepinen minnetdarshılıq xatları hám bayram sawǵaları tapsırıldı. Húrmetli Prezidentimiz Sh.Mirziyoev óz shıǵıp sóylewlerinde «Hayallar – shańaraǵın, abırayın hám keleshekti oylaydı», – dep aytıp ótken edi. Haqıyqatında da, Hayal-qızlarımızdıń barlıq umtılıwları, arzıw-maqsetleri tek ǵana jaqsıllıqqa jeteleydi. Kewlindegi sap tuyǵıları menen dúnyanı gózzallıqqa bóleydi. Olar mudamı Elimiz tınıshlıǵı ushın ózin juwapker sanaydı. Ómirlik joldası menen perzentleri, ulları menen kelinleri, hátteki, aqlıq-shawlıqları arasında aqıl-parasatqa, awızbirshilikke jetelewshi kópir wazıypasın atqaradı. Sonlıqtan, Sizlerdey ádiwli insanlardı hár kúni, hár saatta abaylap-saqlaw, awırıńızdı jeńilletiw, arzıw-niyetińiz orınlanıwına múdamı ǵamxorlıq kórsetiw bizlerdiń hár birimizdiń parızımız sanaladı — dedi sózge shıqqan nuranıy ustazlarımız.
Ilaj universitet studen-jaslar tárepinen tayarlanǵan koncert baǵdarlaması menen juwmaqlandı.
QMU baspasóz xızmeti
