Milletleraralıq tatıwlıq hám diniy bawrıkeńlikti úgit-násiyatlaw, sonday-aq, Nawrız ulıwma xalıqlıq bayramı múnásibeti menen sporttıń «Qol gúresi», «Arqan tartıs», «Tas kóteriw» túrleri boyınsha QMU Dene mádeniyatı fakulteti birinshiligi ótkerildi. Jarıs dene mádeniyatı teoriyası hám metodikası kafedrası professor-oqıtıwshıları tárepinen shólkemlestirilip, oǵan fakultetten jámi 150 den aslam student-jaslar (er balalar hám qızlar) qatnastı. Jarıs qızǵın bellesiwlerge bay bolıp, jaslardıń «Qol gúresi», «Arqan tartıs», «Tas kóteriw» sport túrlerine bolǵan qızıǵıwshılıǵı, olardıń sport sheberlikleri sınaldı.

Jarısqa tájiriybeli sportshılar, dene mádeniyatı teoriyası hám metodikası kafedrası professor-oqıtıwshıları tóreshilik etti. Jarıs shártleri boyınsha tóreshiler tárepinen ádil bahalanıp, er balalar arasındaǵı jeńimpazlar hám qızlar arasındaǵı jeńimpazlar anıqlanıp, birinshilikti jeńip alıwǵa miyasar boldı. Jarıs jeńimpazları shólkemlestiriwshiler tárepinen tayarlanǵan estelik sawǵaları menen sıylıqlandı.

Ótkerilgen jarıstıń tiykarǵı maqseti studentler arasında sporttıń «Qol gúresi», «Arqan tartıs», «Tas kóteriw» sport túrleri boyınsha jarıslar ótkeriw arqalı student-jaslar arasında salamat turmıs tárizin qáliplestiriw, olardıń óz-ara doslıǵın bekkemlew, universitet kóleminde bul sport túrin rawajlandırıw hám en jaydırıw, olardıń sport sheberligin asırıw, qábiletli sportshı studentlerdi anıqlaw bolıp tabıladı.

R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı