Jańalanıp atırǵan konstituciyada bilim alıw huquqı hám imkániyatı keńeytiriledi.
Jańalanıp atırǵan konstituciya joybarına bilimlendiriw, ilim-pán tarawına tiyisli kóplegen statyalar hám normalar qosılmaqta. Mısalı, Tiykarǵı nızamımızdıń 50-statyasında hár kim bilim alıw huquqına iye dep kórsetilgen. Bunda mámleket úziliksiz bilimlendiriw sisteması, onıń hár qıylı túrleri, mámleketlik hám mámleketlik emes bilimlendiriw shólkemleri rawajlanıwın támiynleydi.
51-statyada puxaralardıń joqarı oqıw orınlarında tańlaw tiykarında mámleketlik grant esabınan oqıw huqıqı belgilep qoyılǵan.
2017-jılǵa shekem joqarı oqıw orınlarında mámleketlik grantlar sanı qısqarıp kelgen bolsa, keyingi altı jıl ishinde bakalavr hám magistratura basqıshları ushın bir neshe ese kóbeygenliginiń guwasımız.
Sonday-aq tiykarǵı nızamda puxaralardıń biypul baslanǵısh kásip-ónerge oqıtılıwı da belgilenbekte.
Nágiranlıǵı bar balalarǵa óz teńlesleri menen bir qatarda teńdey bilim alıwı ushın barlıq shárayatlar jaratıw kózde tutılıwı bul Jańa Ózbekstanda insan qádriniń bálent ekenliginen derek.
Konstituciynıń 52-statyasında mámleket oqıtıwshılar qádir-qımbatın qorǵaw, olardıń sociallıq tınıshlıǵı, kásiplik tárepinen ósiwi boyınsha ǵamxorlıǵı kúsheytiriliwi belgilengen, bul bolsa oqıtıwshılardıń abırayınıń jánede asıwına xızmet qıladı hám biz oqıtıwshılardıń elede óz kásibimizdi súyiwge, alǵa ilgerilewimizge sebepshi boladı.
Bunnan tısqarı Joqarı bilimlendiriw shólkemlerine akademiyalıq erkinlik, ózin-ózi basqarıw, tájiriybeler ótkeriw hám oqıtıw erkinligi huquqınıń kiritiliwi oqıtıwshılar hám studentlerdiń oqıw processindegi ǵárezsizligin támiynlewge xızmet qıladı.
Jánede jańa konstituciyamızda mámleket shańaraqtıń tolıq rawajlanıwı ushın socialıq, ekonomikalıq, huquqıy hám basqa shárt-sharayatlar jaratıw konstituciyalıq tárepten bekkemlenbekte. Endi perzent tárbiyası, olarǵa bilim beriw, bárkamal kamalǵa keltiriw ata-ana májbúriyatı, al balanıń huquqları, erkinlikleri, olardıń aqlıy hám fizikalıq, mádeniy tolıq rawajlanıwı ushın eń jaqsı shárt-sharayatlardı jaratıw, mámleket minneti etip belgilenbekte.
Tiykarǵı nızamda balalar miynetiniń balanıń den sawlıǵına, qáwipsizligine, aqılıy hám fizikalıq rawajlanıwına qáwip tuwdırıwshı, olardıń bilim alıwına tosqınlıq qılıwshı hár qanday is qadaǵalanıwı belgilenbekte.
Ańlaǵanımızday, konstituciyamızǵa kiritilip atırılǵan hár qanday ózgeris insan qádiri, insan mápleri ushın.
Biz inglis til bilimi kafedrası professor-oqıtıwshıları jańalanıp atırǵan konstituciyamızǵa biyparıq emespiz.
Sonlıqtan bársheni 30-aprel kúni bolıp ótetuǵın ulıwma xalıqlıq referendumda qatnasıwǵa shaqırıp qalamız.
Konstituciya bárshemizdiki!
Shet tiller fakulteti
Inglis til bilimi kafedrası baslıǵı
doc. G.Djoldasova
