Aldın xabar bergenimizdey Berdaq atındaǵı Qaraqalpaq mámleketlik universitetinde “Rektor kubogi” ushın student-jaslar arasında sporttıń shaxmat, badminton, stol tennis, voleybol, kishi futbol túrleri boyınsha 2 ay dawamında jarıslar bolıp ótti. Búgin usı ótkerilgen sport jarıslarında jeńimpaz bolǵan student-jaslardı sıylıqlaw máresimi bolıp ótti.

Onda universitetimiz rektorı A.Reymov sózge shıǵıp, óz sózinde mámleketimiz tárepinen jaslar mánawiyatın joqarılatıw hám olardıń bos waqıtların mazmunlı ótkeriw boyınsha alıp barılıp atırǵan ilajlar haqqında aytıp, bárshe jeńimpazlardı qolǵa kirgizgen tabısları menen qızǵın qutlıqlap, jeńimpaz komandalarǵa kubok, diplom hám estelik sawǵaların tapsırdı.

Ótkerilgen ilajdıń tiykarǵı maqseti Prezidentimiz tárepinen ilgeri súrilgen bes áhmiyetli baslama hám sporttı rawajlandırıw boyınsha qabıl etilip atırǵan húkimet qaralarınıń orınlanıwın támiyinlew, sonday-aq, olar arasında salamat turmıs tárizin qáliplestiriw hám sportqa bolǵan qızıǵıwshılıǵın elede kúsheytiw bolıp tabıladı.

Ótkerilgen jarıslarǵa barlıq fakultetlerden student-jaslar qatnastı shaxmat sport turinen 30 dan aslam erler hám qızlar, badminton sport turinen 30 dan aslam erler hám qızlar, Stol tennis sport turinen 100 den aslam erler hám qızlar, voleybol sport túrinen 300 den aslam erler hám qızlar, kishi futbol sport turinen 160 tan aslam er balalar  qatnastı.

QMU baspasóz xızmeti