QMU Sanaat texnologiyası fakulteti 5320300-Texnologiyalıq mashinalar hám qurılmalar (ximiya sanaatı) qánigeliginiń
4-basqısh studentleri diplom aldı ámeliyatında Qońırat rayonı aymaǵında jaylasqan «Uz-Kor Gaz Chemical» qospa kárxanasında boldı. Ámeliyatqa Sanaat texnologiyası kafedrası stajyor oqıtıwshısı A.Qutıbaev basshılıq etti.

Kárxanada tiykarınan GSP, Etilen, HDP, PP, OZX hám qosımsha Raspasofka, Palimer sklad, Kip, Avtomatika, Avtotransport, Temir jol cexlarınan ibarat. Bul cexlar gazdi qayta islep, onnan polietilen, polipropilen hám basqada xalıq xojalıǵında paydalanatuǵın ónimler islep shıǵaradı.

Dáslep ámeliyatta student-jaslar texnika qáwipsizlik qaǵıydaları menen tanıstı. Ámeliyat dawamında “GSP” cexı boyınsha usı cextıń operatorları gazlerdi tazalaw hám ajıratıw haqqında studentlerge túsindirip, sońınan usı cex haqqında tanıstırdı. Sonıń menen birge studentler etilen alıw cexında bolıp, ol jerde usı cextıń operatorlarınan etilen alıw boyınsha maǵlıwmatlarǵa iye boldı. Bul cex tómendegi zonalarǵa bólinedi. Yaǵnıy 100 zona shiyki zattı piroliz pechke tayarlaw, 200 zona piroliz pechten shıqqan ónimdi frakciyaǵa ajıratıw, 300 zona kompressorlar hámde silti menen juwıw hám gazdi qurıtıw, 400 zona debutanizator hám depropanizator, 500 zona reaktor, demetanizator, koldvoks, ekspander, komprossor jaylasqan zona, 600 zona deetanizator, etilen menen juwıw, 700 zona MAP (metilacetilen, propadien), reaktor, 800 zona propilen menen suwıtıw, 900 zona par sistemasın islew quwatına iye. Sonıń menen birge, student-jaslar polipropilen alıw cexına borıp, lekciya sabaǵın ótti hám ol jerde granulanı saqlaw hám jetkerip beriw zonası haqqında taraw qánigelerinen maǵlıwmatlar aldı.

Pitkeriw aldı ámeliyatında studentler cexlardıń jaylasqan maydanına barıp óz kózi menen kórip, oqıw barısında alǵan teoriyalıq bilimlerin ámeliyatda jáne de bekkemledi.