1993-jıl 9-aprel – Qaraqalpaqstan Respublikası Konstituciyası qabıl etilgen kún. Usı múnásibet penen 7-aprel kúni Berdaq atındaǵı Qaraqalpaq mámleketlik universiteti Dene mádeniyatı fakultetinde «Konstituciya baxtımız tiykarı» atamasında ushırasıw ótkerildi.
Ilajǵa Dene mádeniyatı fakulteti dekanı N.Kaypov, dene mádeniyatı fakultetiniń jaslar menen islesiw boyınsha dekan orınbasarı R.Óteniyazov, oqıw isleri boyınsha A.Nurjanov, Yuridika fakultetiniń «Insan huqıqları mámleketlik huqıq hám basqarıw» kafedrası assistenti R.Omirzakov, tyutorlar hám student-jaslar qatnastı.
Ushırasıwda bayanatshılar qatnasıwshılardı Qaraqalpaqstan Respublikası Konstituciyası qabıl etilgenliginiń 30 jıllıǵı menen qutlıqlap, konstituciya hár bir mámlekettiń maqtanıshı bolıp esaplanatuǵınlıǵı, konstituciyamız kóp milletli xalqımızdıń siyasiy hám huqıqıy sanasınıń jarqın sáwlesi sıpatında demokratiyalıq mámleket hám de puqaralıq jámiyet qurıw, xalıqaralıq maydanda mámleketimizdiń múnásip orın iyelewi ushın bekkem tiykar bolıp xızmet etip atırǵanlıǵın keltirip ótti. Húrmetli jurtbasshımız atap ótkenindey «Biz tek demokratiyalıq jámiyet emes, demokratiyalıq ádil jámiyet qurmaqtamız» onda ádalat hám haqıyqat ideyası jámiyetlik turmısımızdıń barlıq tarawların óz ishine alatuǵınlıǵın aytıp ótken edi. Demokratiyalıq jámiyettiń eń áhmiyetli belgileriniń biri jámiyet aǵzalarınıń nızam aldında teńligi, konstituciya hám nızamlar ústinliginiń támiyinlengenligi, sonıń menen birge konstituciya hám nızamlardıń baslı maqseti insan, onıń huqıq hám erkinliklerin támiyinlewden ibarat bolıwı lazım hám bunıń ayqın dáliyli párawan turmısımızda óz sáwleleniwin tapqan.
Ilaj sońında usı jıldıń 6-aprel kúni aralıǵında «Konstituciya baxtımız tiykarı» uranı astında Dene mádeniyatı fakulteti student-jasları arasında sporttıń shaxmat túri boyınsha ótkerilgen jarıs jeńimpazlarına estelik sawǵaları tapsırıldı.
Ótkerilgen ilajdıń tiykarǵı maqseti jaslarımızdı konstituciyanıń mazmunı hám áhmiyeti menen menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
