Húrmetli Prezidentimiz 2022-jılı 20-iyul kúni Ózbekstan Respublikası Konstituciyasına birqansha ózgeris hám qosımshalar kirgiziw haqqında bayanat penen shıqtı. Jańalanǵan Konstituciyada oqıtıwshılar hám de student jaslar, tálim sisteması haqqında da keń kólemli ózgerisler ámelge asırıw rejelestirilgen. Puqaralıq huqıq tiykarında hár bir insan tegin bilim alıwǵa haqlı hám de mámleket bunı kepillikke aladı. Al bunday imkaniyatlar bolsa Konstituciyasımızda kórsetip ótilgen.
Demek, Ózbekstan Respublikası Konstituciyası Mámlekettiń tiykarǵı nızamı bolıp esaplanadı hám bárshe puqaralardıń huqıq hám erkinlikleri kórsetilgen hújjet. Házirgi kúnde barlıq mámleket puqaralarınıń huqıqları Konstituciya arqalı qorǵaladı hám májburiyatları kórsetiledi. Jaqında elimizde úlken siyasıy mapaz boladı, yaǵnıy jańa Konstituciyası qabıl etiliwine baylanıslı Referendum ótkeriledi. Mámlekettiń bárshe puqaralarınıń Watan aldındaǵı muqaddes májburiyatı bul óz keleshegi ushın dawıs beriw, yaǵnıy Referendumda qatnasıw. Jańa Konstituciyasinıń aldınǵısınan parqı júda úlken, siyasiy jaqtan jáne de rawajlandırılǵan hám puqaralardıń jeke huqıqları qorǵawǵa alınǵan.
El aldındaǵı patriotizm sezimi bársheni Referendumǵa jetelep barıwına isenemiz, sebebi Konstituciya bul bárshemizdiki, Watanımızdıń keleshegi sheshiletuǵın bul tariyxıy kún ele kóp insanlardıń yadında, ómirinde mórlenedi.
Bul ótkerilip atırǵan ilajlarda, ásirese jaslar júda belsene hám óz baslamaları menen qatınasıp kelmekte. Sonday-aq, Qaraqalpaq mámleketlik universiteti shet tilleri fakultetinde bul jumıslar dawam ettirilip, student jaslardıń Watansúyiwshilik sezimin arttırıw maqsetinde seminar-treningler hám de úgit-násiyat jumısları alıp barılmaqta.
Hár bir student, professor-oqıtıwshılar ózleriniń puqaralıq minnetin tereń túsinip, referendumda jańa Konstituciya ushın dawıs beriwge hám de jámiyet rawajlanıwı ushın óz úlesin qosıwǵa hámiyshe tayar.
Shet tilleri fakulteti hayal-qızlar máseleleri boyınsha dekan másláhátshisi M.Ametova
