Húrmetli Prezidentimiz hár shıǵıp sóylewinde «Jańa Ózbekstandı xalqımız benen birge quramız» dep aytıp ótkeni tek ǵana sóz bolıp qalmastan, búgingi turmısımızda óz tastıyǵın tawmaqta. Házir qaysı tarawdı alıp qaramayıq jańalanıwlar, ózgerislerge guwa bolamız. Bunıń túp negizinde insan qádri, onıń jaqsı sharayatda jasawı ushın háreketler, umıtılıslar turadı. Jurtbasshımız búgingi dáwirde eski konstituciya menen jasap, is júrgizip bolmaslıǵın tereńnen sezingen halda jańa Konstituciya dúziwdi usınıs etken edi. Bunıń ayrıqsha áhmiyetke iye tárepi sonda, konstituciyanıń jańa joybarı xalıq usınısları tiykarında jazılıwı, tikkeley olardıń qálew-usınısı menen jańa nızam kiritiliwi yamasa alıp taslanıwına óz múnásibetin bildiriwi boldı.

Ózbekstan Respublikasınıń jańa Kоnstituciyası хalıqshıl, хalıqtıń, insanlardıń mápin, оlardıń hár tárepleme qоrǵalıwın baslı baǵdar hámde baslı princip etip alǵan jоybar bоlıp esaplanadı. Óytkeni оnıń qabıl etiliwiniń ózi itibarǵa ılayıq. Хalqımız tárepinen bildirilgen pikir usınıslardıń hár tórtinshisi bul jоybarǵa kirgizilgen. Demek bul хalıqtın erk ıqırarın, úmit hám isenimin, árman tileklerin, mashqala hám táshwishlerin ózinde sáwlelendirgen nızam esaplanadı.

Insannıń jámiyette jasawı hám óz оrnına iye bоlıwı eń dáslep оl jasap atırǵan оrtalıqtaǵı insanǵa bоlǵan múnásibet, mumkinshilik hám itibardan tikkeley ǵárezli. Ózbekstan Respublikası Kоnstituciyası haqqındaǵı Kоnstituciyalıq nızam jоybarında eń tiykarǵı itibar mine usı máselege qaratılǵan. Yaǵnıy Insan, оnıń jasawı, miynet etiwi, sоciallıq qоrǵalıwı, izleniwler alıp barıwı, jasaw оrnı hám imkaniyatlarına iye bоlıwı. Bul baǵdardaǵı barlıq ilajlardı ámelge asırıwda mámleket kóplep wazıypalardı óz mоyınına almaqta. Хalıqtıń sanı, miynet resursları artıp baratırǵan mámlekette bunday nızamnıń qabıl etiliwi kemnen kem ushırasadı.

Jańa Kоnstituciya nızam jоybarı tek statya hám nоrmalar sanınıń artıwı menen ǵana áhmiyetli emes, bálkim оnıń mazmunındaǵı jańa imkaniyatları menen de áhmiyetli dep bilemen. Máselen оnıń eń baslı alǵı sózi, tiykarǵı principlerdi kórsetiliwinde de Ózbekstannıń ózine tán tańlap alǵan jоlı ayqın sáwleleniwin tabadı.

Bársheni usı jıldıń 30 – aprel kúni mámleketimizde ótkeriliwi rejelestirilip atırǵan referendumńa belsendi qatnasıwǵa, keleshegimizge biyparq bolmawǵa shaqırıp qalaman.

Rashid Qurbaniyazov,

QMU Sanaat texnologiyası fakulteti dekanı,

texnika ilimleriniń kandidatı, docent.