Qaraqalpaqstan Respublikası Joqarǵı Keńesi deputatı Axmed Reymov ózi saylanǵan aymaq turǵınları menen Konstituciyalıq reformalardıń mazmun-mánisin, áhmiyetin, sonday-aq, búgingi kúnde Húrmetli Prezidentimiz baslaması menen aymaqlarda alıp barılıp atırǵan ózgerislerdi xalıqqa túsindiriw maqsetinde aymaq turǵınları menen ushırastı.
Ushırasıwǵa Nókis qalası hákiminiń birinshi orınbasarı K.Kalimbetov hám “5-Qos kól” saylaw okrugine qaraslı mákan puqaralar jıyını baslıqları, kóshe biyleri nuranıylar, hákim járdemshileri, jaslar jetekshileri hám háyal-qızlar belsendileri qatnastı. Ushırasıwda Qaraqalpaqstan Respublikası Joqarǵı Keńesi deputatı Axmed Reymov óz sózinde Húrmetli Prezidentimizdiń baslaması menen keyingi jılları elimizde ámelge asırılıp atırǵan ózgeris hám jańalanıwlar, ásirese bul baǵdarda Aral teńiziniń qurıǵan ultanın jasıl qaplamaǵa aylandırıwda alıp barılıp atırǵan jumıslar, sonday-aq barlıq qala hám rayonlarda, máhállelerde xalıqtı razı qılıwda islenip atırǵan jumıslardıń bárshesi eń aldı menen «Insan qádiri ushın» ekenligin turmıslıq mısallar menen atap ótti. Ushırasıwda xalıq wákili jańalanıp atırǵan Konstituciyanıń áhmiyeti, Tiykarǵı nızamımızǵa kiritilip atırǵan ózgerisler hám normalar boyınsha da keńnen túsinikler berip ótti. Sonday-aq bársheni mámleketimizde usı jıldıń 30-aprel kúni bolıp ótetuǵın siyasiy proceste belsene qatnasıwǵa shaqırıp qaldı. Ushırasıwda Nókis qalası hákiminiń birinshi orınbasarı K.Kalimbetov óz sózinde mámleketimizde ámelge asırılıp atırǵan jumıslar, máhállelerde alıp barılıp atırǵan abadanlastırıw hám kóklemzarlastırıw jumısları, máhálleler kesiminde xalıqtın mashqalaların sheshiwde ámelge asırılǵan jumıslar nátiyjesi keyingi jıllarda sezilerli dárejede artqanın aytıp ótti. Ilaj dawamında máhálle turǵınları sózge shıǵıp, ózleriniń pikir hám usınısların bildirdi. Bunnan soń ushırasıw qatnasıwshılarına universitet jámááti tárepinen iftarlıq dasturxanı jayıldı. Onda Qaraqalpaqstan musılmanları qazıyatı qazısı Sh.Bahauddinov óz sózinde Múbárek ramazan ayınıń pazıyletleri, shańaraqlarımızǵa, kewillerimizge quwanısh, elimizge qut-bereket baǵıshlawı, bir-birimizge bolǵan miyrim-shápáátimizdi jáne de zıyada etetuǵınlıǵı, Ramazan ayında ámelge asırılıp atırǵan bunday iygilikli ilajlar jámiyetimizde tınıshlıq, doslıq, mehir-múriwbet, keńpeyillik ortalıǵın bekkemlewge xızmet etetuǵınlıǵın aytıp ótip, bárshege óz minnetdarshılıǵın bildirdi.
