Búgin 18-aprel kúni Tashkent qalasında mámleketimizdiń 8 jetekshi universiteti hám de Irannıń 10 universiteti menen «Regionlararalıq birge islesiwdi qollap-quwatlaw»-bilimlendiriw tarawında izertlewler hám innovaciyalar boyınsha 1-Ózbekstan -Iran xalıqaralıq onlayn akademiyalıq forumı bolıp ótpekte. Forumda Berdaq atındaǵı Qaraqalpaq mámleketlik universiteti rektorı, professor Axmed Reymovta qatnaspaqta. Dáslep forumdı Jipek jolı izertlew akademiyası doktorı Azamat Akbarov ashıp berdi hám alıp bardı.
Forumda universitetimiz rektorı, professor Axmed Reymov sózge shıǵıp, sońǵı jıllarda Ózbekstan hám Iran Islam Respublikası arasındaǵı múnasibetler barlıq tarawlar boyınsha rawajlanıp atırǵanlıǵı, bunıń ayqın mısalı retinde, házir kúnde elimizde 400 ge jaqın Iran qarjıları qatnasındaǵı kárxanalar jumıs alıp barıp atırǵanlıǵın atap ótti. Sonday-aq, búgingi ótkerilip atırǵan forum, Iran Islam Respublikası universitetleri menen baylanıslarımız elede bekkemlenip, aldaǵı waqıtları ilim tarawındaǵı birge islesiwler dawam etip, keleshekte mámleketimiz ushın xızmet etetuǵın jańa qospa joybarlar ústinde jumıs alıp barıw haqqında aytıp ótti. Sonıń menen birge forum jumıslarına tabıslar tilep, forum shólkemlestiriwshilerine óz minnetdarshılıǵın bildirdi.
Bul forumnıń maqseti Xalıq aralıq tájiriybe almasıwdı elede bekkemlew hám rawajlandırıw, Mádeniyatlararalıq baylanıstı kúsheytiw, Ilim boyınsha joybarlardı xoshametlew, sonday-aq, jańa bilimlerdi jaratıw hám tájiriybe almasıw bolıp tabıladı. Forum dawam etpekte…
QMU baspasóz xızmeti
