Búgin 18-aprel kúni, Berdaq atındaǵı Qaraqalpaq mámleketlik universiteti Ekonomika fakultetinde Qaraqalpaqstan Respublikası Turizm hám mádeniy miyras ministrligi, Germaniya xalıqaralıq birge islesiw shólkemi (GIZ) hámde Berdaq atındaǵı Qaraqalpaq mámleketlik universiteti menen birgelikte universitetimizdiń turizm baǵdarında bilim alıp atırǵan student jaslarmızdıń teoriyalıq bilimlerin ámeliyatta elede bekkemlew maqsetinde Turizm laboratoriyasınıń ashılıw máresimi bolıp ótti.
Onda Qaraqalpaqstan Respublikası Ministrler Keńesi Baslıǵınıń orınbasarı – turizm hám mádeniy miyras ministri Rasul Zarikeev, Germaniya xalıqaralıq birge islesiw shólkeminiń sırt elli wákilleri, Germaniyanıń Ózbekstandaǵı elshixanasınıń wakilleri hám Berdaq atındaǵı Qaraqalpaq mámleketlik universiteti rektorı Axmed Reymov, fakultet professor-oqıtıwshıları hám student-jasları qatnastı. Dáslep, Germaniya xalıqaralıq birge islesiw shólkemi (GIZ) tárepinen kelgen miymanlar sózge shıǵıp, Ózbekstan Respublikasında turzim tarawında alıp barlıp atırǵan ilajlar haqqında aytıp, Qaraqalpaq mámleketlik universiteti Turizm laboratoriyasınıń ashılıwı menen bársheni qızǵın qutlıqladı.
Bunnan soń, universitetimiz rektorı A.Reymov miymanlardı jańadan ashılǵan Turizm laboratoriyasınıń múmkinshilikleri menen tanıstırıp, olar menen óz-ara sáwbet alıp bardı. Sáwbet dawamında universitetimizde 2018/2019 oqıw jılında Turizm bakalavr tálim baǵdarı, sonday-aq, 2022/2023 oqıw jılınan baslap magistratura qánigeliginiń ashılǵanlıǵın aytıp ótti. Sonıń menen birge, rektor A.Reymov Germaniya xalıqaralıq birge islesiw shólkemi (GIZ) baslaması menen paydalanıwǵa tapsırılıp atırǵan bul joybar ushın universitetimiz jámááti atınan miymanlarǵa óz minnentdarshılıǵın bildirip, keleshekte studentlerimiz ushın turizm tarawında alıp atırǵan teoriyalıq bilimlerin ámelde qollap, elede bekkemlew ushın uzaq jıllarǵa xızmet etetuǵınlıǵın aytıp ótti.
Bul Turizm laboratoriyası Qaraqalpaqstan Respublikası Turizm hám mádeniy miyras ministrligi hám Germaniya xalıqaralıq birge islesiw shólkeminiń baslaması menen shólkemlestirilgen bolıp, ol miymanlardı qabıl etiw, miymanxana iskerligi, ulıwma awqatlanıw hám basqa da ámeliy shınıǵıwlarǵa mólsherlengen. Turizm laboratoriyasınıń tiykarǵı maqseti tarawda bilimlendiriw sapasın elede asırıw, pitkeriwshi kadrlardıń ámeliy kónlikpelerin jetilistiriw, jeke sektorda básekiles kadrlardı tayarlaw, sonıń menen birge turizm tarawındaǵı jeke sektor wakilleri hám universitet arasında birge islesiwdi jolǵa qoyıwdan ibárat.
QMU baspasóz xızmeti
