Aldın xabar bergenimizdey usı jıldıń 20-aprel kuni Moynaq rayonında Xalıqaralıq Araldı qutqarıw qorı dúzilgeniniń 30 jıllıǵı keń túrde belgilendi. Usı múnásibet penen student-jaslar arasında «Aral boyı aymaǵın rawajlandırıwda innovaciyalıq sheshimler» atamasında tańlawdıń juwmaqlawshı respublikalıq basqıshı ótkerilip, tańlawda respublikamızdıń 9 joqarı oqıw orınlarında bilim alıp atırǵan 26 ziyrek, dóretiwshi student-jaslar óz-ara bellesti.
Tańlawda universitetimizdiń Ximiya-texnologiya fakulteti 2-kurs magistrantı Ospanov Temur óziniń “Exclusive, Innovaciyalıq elektr ayaq kiyim”, joybarı menen qatnasıp, sıylı 1-orındı iyeledi. Tańlaw jeńimpazın búgin Berdaq atındaǵı Qaraqalpaq mámleketlik universiteti rektorı A.Reymov qızǵın qutlıqlap, aldaǵı oqıwlarında hám dóretiwshilik jumıslarında tabıslar tiledi. Sonday-aq, ol óz sózinde mámleketimiz tárepinen student jaslardıń innovaciyalıq dóretiwshilik qábiletin júzege shıǵarıw, intellektuallıq dárejesin rawajlandırıw, olardı qollap-quwatlaw boyınsha keń múmkinshilikler jaratılǵanlıǵın aytıp ótti.
Maǵlıwmat ushın, bul tańlawǵa universitetimizden 3 studtent yaǵnıy Ospanov Temur Ximiya-texnologiya fakulteti 2-kurs magistranti óziniń “Exclusive, Innovaciyalıq elektr ayaq kiyim”, Elmuratov Alpamis Fizika fakulteti Elektr-energetika qanigeligi 4-kurs studenti “Qayta tikleniwshi energiya derekleri tiykarındaǵı nasos apparatın islep shıǵıw” hám Tórejanov Islamjan Geografiya hám tabiyiy resurslar fakultetti 4-kurs studenti “Travel in Karakalpakstan” mobil baǵdarlamaları menen belsene qatnastı. Tańlaw juwmaǵında jeńimpazlarǵa 1-orın 10 mln, 2-orın 5 mln, 3-orın 3 mln sumlıq vaucherler saltanatlı túrde tapsırıldı. Sonıń menen birge, tańlawǵa qatnasqan bárshe jaslar qor tárepinen tayarlanǵan húrmet jarlıǵı hám estelik sawǵaları menen sıylıqlandı.
