Búgin paytaxtımız Nókis qalasındaǵı I.Savickiy atındaǵı Qaraqalpaq mámleketlik kórkem óner muzeyi aldında «Milliy libaslarımız — qádiriyatlarımız aynası» atamasındaǵı ruwxıy-aǵartıwshılıq ilajı bolıp ótti. Ilajda Ózbekstan Respublikası Bas prokuraturası bólim baslıǵı U.Utaev, «Osiyo ramzi» dizaynerler awqamı baslıǵı X.Komilova, Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komiteti baslıǵı M.Axmedovalar qatnastı.

Sonday-aq, bul ilajǵa Qaraqalpaq mámleketlik universitetiniń Kórkem óner fakulteti 3-kurs studenti, dizayner 2022-jılı Dubay qalasında ótkerilgen jas dizaynerler tańlawınıń Granpri jeńimpazı Indira Jumabaeva óziniń «Aral úmiti» milliy hám zamanagóy kiyimler kollekciyası menen hám universitetimizdiń Biologiya fakulteti 3-kurs studenti Jamila  Jiyenbaeva óziniń «Tumaris áwladları» milliy kiyimler kollekciyası menen qatnasıp, óz qollarınan  dóretken milliy hám zamanagóy kiyimleri menen kópshilikte qızıǵıwshılıq oyattı hám jaqsı tásirler qaldırdı. Dizayner qızlarımızdıń milliy kiyimler kolleciyasın saxnada ajayıp etip kórsetip beriwde universitetimizdiń jas model student qızları belsendilik kórsetti.