Berdaq atındaǵı Qaraqalpaq mámleketlik universitetinde búgin 26-aprel kúni belgili alım-gidrolog hám gidroximik, geografiya ilimleri doktorı, professor Elmir Ismoilovich CHembarisovtıń 75 jıllıǵına baǵıshlanǵan «Qubla Aral boyınıń gidrologiyalıq hám gidroekologiyalıq mashqalaları: búgini hám keleshegi» atamasındaǵı respublikalıq ilimiy-ámeliy konferenciyası bolıp ótti. Atap ótiwimiz kerek, keyingi jıllarda jer hám suw resurslarınan nátiyjeli paydalanıwdı támiyinlew, suw xojalıǵı sistemasın jetilistiriw, suw xojalıǵın modernizaciyalaw hám rawajlandırıw boyınsha bir qansha reformalar ámelge asırılmaqta. Sonıń menen birgelikte, global klimat ózgeriwi, xalıq sanınıń hám ekonomika tarawlarınıń ósiwi, olardıń suwǵa bolǵan talabınıń jıl sayın artıp barıwı, suw resurslarınıń jetispewshiligi jıldan-jılǵa artıp barıp atır. Bul konferenciyanıń ótkeriliwinen tiykarǵı maqset Qubla Aralboyınıń gidroekologiyalıq jaǵdayınıń aktual máselelerine sheshim tabıw, gidroximiya ilimleriniń elede rawajlanıwına erisiw, bul baǵdardaǵı taraw alımlarınıń ilimiy tiykarlanǵan usınısların islep shıǵıw boyınsha sheriklikti rawajlandırıw bolıp esaplanadı.
Konferenciya jumısında Universitettiń Geografiya hám tábiyiy resurslar fakulteti professor-oqıtıwshıları, jas alımlar, tayanısh doktorantlar, sonday-aq, sırt el hám respublikamızdıń jetekshi joqarı oqıw orınları hám ilimiy izertlew mekemelerinen, atap aytqanda, Ózbekstan Respublikası Ilimler Akademiyasınıń Irrigaciya hám suw mashqalaları institutı professorı, alım-gidrolog hám gidroximik, geografiya ilimleri doktorı, professor E.I.CHembarisov, usı instituttıń Qaraqalpaqstan aymaqlıq orayı direktorı S.Qurbanbaev, Ózbekstan Respublikası Ilimler Akademiyasınıń Qaraqalpaqstan bólimi Qaraqalpaq tábiyiy pánler ilimiy izertlew institutı direktorı, b.i.d., professor S.M.Mambetullaeva, G.Mavlyanov atındaǵı Seysmologiya institutı direktorı V.A.Rafiqov, Nawayı mámleketlik pedagogika institutı kafedra baslıǵı S.Shodiev hám basqa da taraw boyınsha belgili ilimpaz hám qánigeler belsendi túrde qatnastı. Konferenciya joqarı shólkemleskenlik hám qızıqlı pikir alısıwlarǵa bay tárizde ótkerildi.
