Búgingi kúnde «Ózbekstan – jaslar mámleketi» degen ibara jiyi-jiyi aytılmaqta. Húrmetli Prezidentimizdiń tikkeley ǵamxorlıǵı nátiyjesinde elimizde ilim-bilimge qushtar jaslar kóplep jetilisip shıqpaqta. Jaslardıń jámiyetlik turmıstıń barlıq tarawlarında belsendiligin arttırıw maqsetinde ótkerilip kiyatırǵan «Bes áhmiyetli baslama» ilajları óz jemisin berip atır. Bul ilajlarǵa Tariyx fakultetiniń student-jasları da belsene qatnasıp, ózleriniń bilimge qushtarlıǵı, ziyrekligi hám uqıplılıǵı menen kózge túspekte. Solardıń biri sıpatında fakultetimizde qábiletli jaslar qatnasıwında shólkemlestirilgen «Úlgili jaslar» klubı tárepinen alıp barılıp atırǵan unamlı baslamalar bunıń ayqın mısalı.
Jaqında usı klub sheńberinde «Jas ilimpazlar» dógeregi óz jumısın baslaǵan edi. Soǵan qaramastan, bul dógerek kóplegen nátiyjelerge erispekte. Dógerekke fakultetimizdiń 4-kurs studenti, Prezident stipendiyası iyesi X.Utemuratova basshılıq etedi.
Bul belsendi studentimiz basshılıǵında «Ilim jolı» atlı onlayn maqalalar tańlawı ótkerildi. Tańlawǵa Tariyx fakulteti studentleri menen birge universitettiń basqa da fakultetlerinen, sonday-aq, Nókis mámleketlik pedagogikalıq institutı, Ózbekstan mámleketlik kórkem óner hám mádeniyat institutı Nókis filialı studentleri de óz maqalaları menen qatnastı. 26-aprel kúni usı tańlawdıń juwmaǵına baǵıshlanıp Tariyx fakultetinde sıylıqlaw keshesi bolıp ótti. Kesheni fakultet dekanı, tariyx ilimleriniń kandidatı, docent S.Sulaymanov kiris sóz benen ashtı hám alıp bardı. Ol óz sózinde student-jaslardıń ilim jolındaǵı imkaniyatların ashıp beriwde bul tańlawdıń tutqan áhmiyeti, tańlawǵa kóplegen studentlerdiń belsene qatnasqanlıǵı, tańlawǵa kelip túsken maqalalardı bahalap barıwda fakultet professor-oqıtıwshıları hám tyutorlarınıń miynetleri haqqında aytıp ótti. Solay etip, tańlawdıń «Eń jaqsı ilimiy maqala» nominaciyası boyınsha Qaraqalpaq mámleketlik universiteti Tariyx fakultetiniń 2-a kurs studenti M.Otarbaeva, «Eń jaqsı jas ilimpaz» nominaciyası boyınsha Qurılıs fakultetiniń 3-kurs studenti G.Uderbaeva, «Ǵalaba xabar qurallarında eń belsendi jas ilimpaz» nominaciyası boyınsha Yuridika fakultetiniń studenti H.Akmalovlar jeńimpaz dep tabıldı. Sonday-aq, mazmunlı maqalaları menen kózge túsken basqa da bir qatar studentler tańlawdıń belsendi qatnasıwshıları sıpatında múnásip bahalandı. Keshe juwmaǵında tańlaw jeńimpazları hám belsendi qatnasqanlar shólkemlestiriwshiler tárepinen estelik sawǵaları, sertifikat hám diplomlar menen sıylıqlandı.
Baxıtgúl Esemuratova,
Qaraqalpaq mámleketlik universiteti
Tariyx fakultetiniń tyutorı
