Insan ómiri onıń neshe jıl jasaǵanı emes, jasap ótken jılları dawamında islegen miynetleri, adamgershilik pazıyletleri menen ólshenedi. «Jaqsınıń jaqsısın ayt iymanı tassın» degenindey kásiplesimiz Nuranov Maxmud Zaripbaevichti eske alsaq eń dáslep onıń joqarı adamgershilik pazıyletleri kóz aldımızda sáwlelenedi. Ele ómirdiń eliw báhárin de qarsılap úlgermegen kásiplesimiz 2016-2019-jıllar aralıǵında universitetimizdiń Kásiplik awqamın basqarıp kelgen bolsa, usı waqıt aralıǵında kóplegen jaqsı nátiyjelerge eristi. Maxmud Nuranov haqqında qansha jaqsı pikirler aytsaq ta az. Eger aramızda bolǵanda kóplegen jaqsılıq hám iygilikli islerge bas bolǵan bolar edi. Kásiplesimizdiń talapshańlıǵı, pidayılıǵı, onıń islegen qayırlı isleri, biziń qálbimizde máńgi saqlanıp qaladı.
Maǵlıwmat ushın:
Ol 1973-jılı 13-martta Qaraózek rayonında tuwılǵan. 1990-jılı rayondaǵı M.Lomonosov atındaǵı mektepti tabıslı tamamlap, usı jılı Qaraqalpaq mámleketlik universitetiniń tariyx-geografiya fakultetiniń geografiya qánigeligine oqıwǵa qabıl etildi. Studentlik dáwirindegi bilimi, ziyrekligi hám ustazlarǵa bolǵan ayrıqsha húrmeti onı oqıwdı tamamlaǵannan soń, ózi tálim alǵan fakultettiń assistent-oqıtıwshısı bolıw baxıtın inám etti.
Keńpeyil hám óz kásibine pidayılıq penen qatnas jasawshı kásiplesimiz óziniń miynet jolında kóp ǵana shákirtlerdiń bilimli, sawatlı hám tárbiyalı bolıwına úlken úles qostı. Óz kásibiniń pidayısı óz kásipleslerine bolǵan húrmeti nátiyjesinde birneshe jıllar dawamında dekan orınbasarı lawazımında da ádiwli miynet etti.
QMU Kásiplik awqam komiteti baslıǵı: A.Alliyarov
