Búgin Berdaq atındaǵı Qaraqalpaq mámleketlik universitetinde “9-may Eslew hám qádirlew kúni” múnásibetı “Tınıshlıq hám tatıwlıq biybaha baylıq” atamasında ilaj bolıp ótti. Onda Ózbekstan Respublikası Qurallı Kúshleriniń rezervtegi polkovnigi, Arqa-Batıs áskeriy bóliminiń Veteranlar Keńesi aǵzası M.Musaev, universitetimiz professor-oqıtıwshıları hám student jasları qatnastı. Ilajda universitet rektorı A.Reymov sózge shıǵıp, tınıshlıq hám tatıwlıq biybaha baylıq, onıń qádirine jetiw kerek ekeninligi, sonday-aq, 1941-1945-jıllardaǵı Ekinshi jáhán urısında ata-babalarımız búgingi biziń párawan turmısımız ushın urıs maydanında hám front artında úlken pidayılıq, mártlik kórsetip, fashizm ústinen erisilgen jeńiske múnásip úles qosqanlıǵın aytıp ótti.
Bunnan soń, universitetimiz belsendi student-jasları tárepinen tayarlanǵan teatrlastırılǵan saxnalıq kórnisler hám koncert baǵdarlaması jıynalǵanlar názerine usınıldı. Haqıyqatında da biz urısqa qatnasqan ata-babalırmız haqqında esitkenimizde, yaki oqıǵanımızda búgingi párawan turmısta jasap atırǵanımızǵa, atqan hár bir tańımızdı jaqınlarımız benen birge qarsı alıp atırǵanımızǵa shúkirshilik etemiz. Sonlıqtan da ekinshi jer júzlik urıstıń aqıbetlerin umıtpaw, búgingi tınısh turmısımızdıń qádirine jetiw, Ana watanımız aldında perzentlik wazıypamızdı hújdan menen atqarıw, hár birimizdiń tiykarǵı wazıypamız bolıwı lazım. Elimizde tınıshlıq bolıp tursa kewilge toy-tamasha sıyadı rawajlanıw boladı, xalıq miynet etip, rısqı nesibesin terip, úy jay qurıp, baxıtlı kún keshiredi. Sonlıqtan tınıshlıqtıń qádirine jetip jasawımız lazım.
Sonıń menen birge, «Tınıshlıq hám tatıwlıq biybaha baylıq» súreni astında ótkerilgen ilaj sheńberinde súwretlew óneri tańlawı shólkemlestirilip, tańlaw juwmaǵında Kórkem óner fakulteti studenti Usenbaeva Xansulıw 1-orındı, Nawrızbaeva Rayxan 2-orındı, Kayıpnazarova Ilgiza hám Saǵıydullaeva Kunsulıw 3-orındı iyeledi.
QMU baspasóz xızmeti
