Biz baxıtlı zamannıń baxtiyar áwladlarımız! Elimiz tınısh, imkaniyatlar sheksiz,niyetler qalıs. Búgingi háreket, izlenis juwapsız emes, olar arzıw. ármanǵa aylanbaydı! Bunday baxıtqa qalay eristik? Tek búgin menen jasaw – biziń qanımızǵa jat nárse. Keleshek ushın,áwladlar baxtı ushın ata- babalar qanshadan-qansha qara kúnlerdi, awır azaplardı kórdi. Watan topıraǵı, perzentler nesiybesi ushın olar shayday ayqasıp,qan juttı. Dushpanlar qolında qansha azamatlar nabıt boldı, biygúná náresteler ákesiz, jas kelinshekler jesir qaldı, analar bawırı tilinip qan boldı. Náletiy urıs xalıq basına usınday ǵawǵalı kúndi saldı. Shańaraqlardıń tolısı shaypalıp,qáddin búkti. Bul kúnlerdi umıtıw adamzat ushın qıyın. Umıtıwǵa haqımız da joq.

Insan bar eken, yadı muqaddes. Hesh kim, hesh nárse esten shıqpaydı.Tariyxtan gúwalıq beriwshi waqıyalar hámmeniń yadında, kókiregine óshpestey izlerin qaldırdı. Bul izler,shandıqlar búgingi tınısh tatıw turmısımızdıń qádirine jetip, shúkirshilik etip jasawımız kerekligin uqtırıp turadı. Bul sezimlerdi jas áwladlarǵa sezindiriw maqsetinde 9-may Eslew hám qádirlew kún múnásibeti menen Shet tilleri fakulteti studentlerin «Hásiretli ana» esteligine sayaxatqa alıp bardım.Sayaxat dawamında urıstıń qıyan- kesti waqıyaların veteran aǵalardan esitken studentler búgingi zamannıń tınıshlıǵına jáne bir márte shúkirshilik sezimlerin túyip qayttı.

Shet tilleri fakulteti tyutorı Ramiza Pirnazarova