Húrmetli Prezidentimizdiń jaslar menen islesiwdiń jańa sistemasın jaratıwǵa qaratılǵan reformalardı úgit-násiyatlaw, student-jaslardıń siyasiy-huqıqıy bilimin jetilistiriw, sonday-aq, olardı sociallıq jaqtan qollap-quwatlaw menen birge kásip-ónerge oqıtıw, bántligin támiyinlew, maqsetinde búgin 11-may kúni Berdaq atındaǵı Qaraqalpaq mámleketlik universitetinde bos jumıs orınları yarmarkası ótkerildi. Onda Qaraqalpaqstan Respublikası Kámbaǵallıqtı qısqartıw hám bántlik ministri S.Turmanov, Ózbekstan Respublikası Joqarı bilimlendiriw, ilim hám innovaciyalar ministrligi Qaraqalpaqstan aymaqlıq basqarmasınıń baslıǵı N.Kayupov, Qaraqalpaqstan Respublikası Ádillik ministrligi bólim baslıǵı A.Utewliev jumıs beriwshi kárxana hám shólkemlerden wakiller, student-jaslar qatnastı.
Dáslep ilajdı universitetimizdiń Jaslar máseleleri hám ruwxıylıq-aǵartıwshılıq isleri boyınsha prorektorı S.Alawatdinov kiris sóz benen ashtı. Ol óz sózinde búgingi kúnde elimizde jaslardıń joqarı bilim alıp, ózleriniń qánigelikleri boyınsha jetik kadrlar bolıp jetilisiwleri ushın jaratılǵan imkaniyatlar haqqında keń túrde maǵlıwmatlar berip ótti. Sonday-aq, búgingi bos jumıs orınları miynet yarmarkasında, bos jumıs orınları menen qatnasıp atırǵan mákeme-kárxana hám shólkemlerdiń basshılarına universitet jámááti atınan óz minnetdarshılıǵın bildirdi. Bunnan soń, Qaraqalpaqstan Respublikası Kámbaǵallıqtı qısqartıw hám bántlik ministri S.Turmanov, Ózbekstan Respublikası Joqarı bilimlendiriw, ilim hám innovaciyalar ministrligi Qaraqalpaqstan aymaqlıq basqarmasınıń baslıǵı N.Kayupov, Qaraqalpaqstan Respublikası Ádillik ministrligi bólim baslıǵı A.Utewlievlar sózge shıǵıp, Húrmetli Prezidentimiz tárepinen mámleketimizde eńgizilip atırǵan reformalardı ámelge asırıwda zamanagóy bilimge iye bolǵan jas kadrlardı jetilistiriw olardıń bántligin támiyinlew oǵada áhmiyetli ekenligin aytıp ótti.
Búgingi ótkerilgen bos jumıs orınları miynet yarmarkasına Berdaq atındaǵı Qaraqalpaq mámleketlik universitetinen 2050 den aslam studet-jaslar qatnasıp, sonnan 263 student-jaslar menen jumıs beriwshiler ortasında jumısqa qabıllaw boyınsha úsh tárepleme shártnamalar dúzildi.
Maǵlıwmat ushın student-jaslardıń bántligin támiyinlew maqsetinde ótkerilgen bos jumıs orınları miynet yarmarkasında 125 mákeme, kárxana hám shólkemler ózleriniń 512 bos jumıs orınları menen qatnastı.
QMU baspasóz xızmeti
