15-may «Xalıqaralıq shańaraq kúni» múnásibeti menen universitettiń Matematika, Ximiy texnologiya hám fizika fakulteti student-jasları arasında usı fakultetlerdiń dekan másláhátshileri R.Kalimbetova, Sh.Erejepova hám G.Nurımbetovalar tárepinen «Shańaraq muqaddes» atamasında ushırasıw keshesi shólkemlestirildi.
Ushırasıwǵa elimizge belgili, kámil perzentler tárbiyalap atırǵan jası úlken, usı dárgayda kóp jıllıq is tájiriybesine iye jaslarǵa tálim tárbiya beriwde ayanbay miynet etip kiyatırǵan ustazlar shańaraǵı Matematika fakultetiniń docenti K.Seydullaevlar shańaragı hám Berdaq atındaǵı Qaraqalpaq mámleketlik akademiyalıq muzıkalı teatrı aktyorı B.Uzaqbergenov, ómirlik joldası Ximiy texnologiya fakulteti fizikalıq hám kolloidlıq ximiya kafedrası kabinet baslıǵı Z.Aynazarovalardıń shańaraqları qatnastı.
Ushırasıwdı universitet hayal-qızlar máseleleri boyınsha rektor másláhátshisi I.Seytnazarova alıp bardı. Ilaj dawamında úlgili shańaraq iyeleri shańaraqlıq múnásibetler, perzent tárbiyasında ata-ananıń ornı, qayınene menen kelin arasındaǵı qatnaslar, sonday-aq shańaraq qurıw hám onıń bekkemligin támiyinlewde jaslarǵa paydalı másláhátlerin berip ótti. Jas shańaraqlar sáwbetlesiw barısında ózleriniń qızıqtırǵan sorawlarına juwaplar aldı. Ilajdı ótkeriwden tiykarǵı maqset jaslardı keleshekke, shańaraqlıq turmısqa tárbiyalaw, sonday-aq kámil insan bolıp jetilisiwinde elimizge belgili shańaraqlardı student-jaslarǵa úlgi etip kórsetiw bolıp tabıladı.
QMU hayal- qızlar keńesi
