Fizika-matematika ilimleriniń doktorı, professor, Ózbekstan Respublikası Ilimler Akademiyasınıń akademigi, Ózbekstan Respublikası ilim ǵayratkeri, Ózbekstan Respublikası ilim hám texnika tarawındaǵı Birinshi dárejeli Mámleketlik sıylıqtıń laureatı, Ózbekstan Respublikası Oliy Majlis Senat aǵzası, Ózbekstan Respublikası Ilimler Akademiyası V.I.Romanovskiy atındaǵı Matematika institutınıń direktorı hám Ózbekstan qaharmanı Shavkat Abdullaevich Ayupov hár jılı Qaraqalpaq mámleketlik universitetiniń matematika fakultetine kelip, ziyrek studentlerge, magistrlarǵa hám jas ilimiy izleniwshilerge lekciya hám seminar sabaqların ótiwdi dástúrge aylandırǵan.
Mine búgin de ádiwli Ustaz fakultetimizge kelip, óziniń gezektegi lekciya sabaqların baslap jiberdi. Sabaqtan soń ádettegishe ilimiy seminar shólkemlestirilip, dáslep Ustaz óziniń ilimiy bayanatın jasadı hám sońinan fakultettegi matematikanıń hár qıylı tarawlarında ilimiy izertlewler alıp barıp atırǵan izleniwshilerdiń bayanatların tıńlap, óziniń pikirlerin bildirip, bahalı másláhátlerin berdi.
Álbette ustazdıń bul uzaq jıllar dawamındaǵı islegen miynetleri óziniń jemisli nátiyjelerin berip úlgergen. Akademik Sh.A.Ayupov mektebinen jetisip shıqqan 2 ilim doktorı, onlap ilim kandidatları hám filosofiya doktorları tek ǵana fakultetimizde emes, pútkil Qaraqalpaqstan respublikasında matematika ilimin rawajlandırıwda salmaqlı úles qosıp kelmekte.
Biz óz gezeginde Ustazdıń bul biybaha miynetleri ushın oǵan pútkil Qaraqalpaqstan xalqı, Qaraqalpaqstan Respublikası Ilim ǵayratkerleri, Qaraqalpaq mámleketlik universiteti jámááti, qalaberse bárshe shákirtleri atınan sheksiz minnetdarshıliq bildirip, Ustazǵa bekkem den sawlıq, ilimiy hám jámiyetlik jumıslarında tasqın tabıslar hám talmas kúsh ǵayrat, shańaraǵına bolsa amanlıq hám awızbirshilik tilep qalamız!
K.U.Begjanova PhD,
QMU, Funkcionallıq analiz, algebra
hám geometriya kafedrası docenti
